29 مامىر, 19:26 577 0 زاڭ انار لەپەسوۆا

ايالداماداعى ادامداردى قاعىپ ولتىرگەن جۇرگىزۋشىگە ۇكىم شىقتى

الماتىدا ايالدامادا تۇرعان ادامداردى قاعىپ ولتىرگەن جۇرگىزۋشىگە قاتىستى ۇكىم شىعارىلدى،  دەپ حابارلايدى Polisia.kz.

ءبىر جىل بۇرىن 2019 جىلدىڭ 16 ناۋرىزىندا ا.ا.تيپيكين  كولىك قۇرالىن جۇرگىزۋ قۇقىعىنان ايىرىلعانىنا قاراماستان، ءوزىنىڭ “تويوتا كوروللا” كولىگىمەن جولعا شىعىپ، كىسى ولىمىنە سەبەپكەر بولعان. 

– بۇل قىلمىسكەر، ونى تەك وسىلاي اتاۋعا بولادى، بۇرىن ماس كۇيىندە كولىك جۇرگىزگەنى ءۇشىن الماتى وبلىسىندا جۇرگىزۋشى كۋالىگىنەن ايىرىلعان، ول سوندا دا وزىنە رولگە وتىرۋعا جانە ۇيدەن شىعۋعا رۇقسات بەرگەن. جولدىڭ باسقا پايدالانۋشىلارىنىڭ ءومىرى مەن دەنساۋلىعىنا قاۋىپ توندىرگەن ول، تاتتىبەكوۆ كوشەسىمەن شىعىسقا بەت الدى. ماس كۇيىندە ءبىرىنشى قاتاردان ەكىنشى قاتارعا قىسقا قاشىقتىقتا مانەۆر جاساپ، جۇرگىزۋشى “پەجو” كولىگىمەن سوقتىعىسادى. تيپكيننىڭ كولىگى سوققىدان ءوز تراەكتورياسىن وزگەرتىپ، ايالداماعا كىرىپ، ءۇش جاياۋ جۇرگىنشىنى قاعىپ كەتەدى. ءارى قاراي، قالدىق ينەرتسيامەن اۆتوكولىك جەكە ءۇيدىڭ قورشاۋىن قاعىپ تاستايدى. قۇدايعا شۇكىر، ول جەردە ەشكىمگە زيان تيگىزبەدى. ءبارى كۇندىز، ساعات 12: 30-دا بولادى، – دەدى  الماتى قالالىق پد انىقتاۋ باسقارماسىنىڭ جول-كولىك وقيعاسىن تەرگەۋ ءبولىمى راۋان ماناپ.

وسى جول-كولىك وقيعاسى سالدارىنان  1988 جىلى تۋعان گ. جانە 1978 جىلى تۋعان ا. ەسىمدى ەر ادام  قايتىس بولدى. الماتى قالالىق سوتىنىڭ قىلمىستىق ىستەر جونىندەگى سوت القاسىنىڭ 2019 جىلعى 4 قىركۇيەكتەگى شەشىمىمەن ا.تيپيكين مىرزا قر قىلمىستىق كودەكسىنىڭ 346-بابى 5-بولىگى بويىنشا ايىپتى دەپ تانىلدى. وعان 8 جىل 6 ايعا باس بوستاندىعىنان ايىرۋ جازاسى جانە 10 جىلعا كولىك قۇرالىن باسقارۋ قۇقىعىنان ايىرىلدى.

– قازىرگى ۋاقىتتا سوتتالعان ت. ەسىمدى ەر ادام جازاسىن ورتاشا قاتاڭ رەجيمدەگى قىلمىستىق-اتقارۋ جۇيەسى مەكەمەسىندە وتەپ جاتىر. بيىل جوعارىدا اتالعان باپتىڭ سانكتسياسى كۇشەيتىلگەنىن اتاپ وتكەن ءجون، – دەپ تولىقتىردى راۋان ماناپ.

سوڭعى جاڭالىقتار