29 مامىر, 12:46 468 0 قوعام انار لەپەسوۆا

ەرتەڭ الماتىدا مەشىتتەر مەن شىركەۋلەر اشىلادى

الماتى قالاسى باس مەملەكەتتىك سانيتارلىق دارىگەرىنىڭ 2020 جىلعى 28 مامىرداعى №32 قاۋلىسىنا سايكەس، 30 مامىردان باستاپ سانيتارلىق-دەزينفەكتسيالاۋ رەجيمىنىڭ تالاپتارىن قاتاڭ ساقتاعان جاعدايدا قالاداعى ءدىني مەكەمەلەر ءوز جۇمىسىن باستاي الادى. 

كارانتين ۋاقىتىندا ءدىني ورىنداردىڭ جۇمىس جاساۋلارىنا قويىلاتىن باستى تالاپ: ۇجىمدىق ءىس-شارالاردىڭ وتكىزىلۋىنە شەكتەۋ قويىلۋى. اتاپ ايتساق، جۇما نامازدارى، سەنبى جانە جەكسەنبى كۇنى وتكىزىلەتىن عيباداتتار، ادامدارمەن توپتالىپ ءدىني ولەڭدەر ايتۋ سەكىلدى جانە باسقا دا ۇجىمدىق سيپاتقا يە قۇلشىلىقتاردى وتكىزۋگە رۇقسات ەتىلمەيدى. اتالعان شەكتەۋلەردىڭ باستى ماقساتى كوروناۆيرۋس ينفەكتسياسىنىڭ تارالۋىنىڭ الدىن الۋ.

سونىمەن قاتار، قۇلشىلىق كەزىندە ءدىني قىزمەتشىلەر مەديتسينالىق ماسكا مەن قولعاپ كيۋگە جانە دە الەۋمەتتىك قاشىقتىقتى ساقتاۋعا مىندەتتى. ال، ماسكا كيمەگەن جانە رەسپيراتورلىق اۋرۋلاردىڭ كەز كەلگەن بەلگىلەرى بار (تەمپەراتۋرانىڭ كوتەرىلۋى، جوتەل، تاماقتىڭ اۋرۋى، تىنىس الۋدىڭ قيىنداۋى) ادامدار ءدىني ورىندارعا كىرگىزىلمەيدى.

ءوز كەزەگىندە، ءدىني شارالارعا قاتىسۋلارىنا رۇقسات ەتىلگەن ادامدارعا عيمارات ىشىندە 15-20 مينۋتتان ارتىق بوگەلۋلەرىنە رۇقسات ەتىلمەيدى.

 

سوڭعى جاڭالىقتار