28 مامىر, 11:04 7321 0 اتاجۇرت Túrkistan Gazeti

امەريكالىقتار اسىراپ العان قازاق بالاسى: اعا، سەنى ساعىندىم!

تاعدىردىڭ جازۋىمەن 1 جاسىندا مۇحيت اسىپ كەتكەن مارات ەسىمدى قازاق بالاسى قازىر 19 جاستاعى بوزبالا. ونى امەريكالىق دونالد پەن دجينني ەسىمدى ەرلى-زايىپتىلار وسكەمەندەگى بالالار ۇيىنەن اسىراپ العان. اقش-تا ماراتقا تەودور ۋولتان دەگەن ەسىم بەرگەن. قازاقستاندا ومىرگە كەلگەندەگى تولىق اتى-ءجونى – مارات توقتارۇلى ورازعاليەۆ ەكەن. جۋىقتا مارات ەلدە قالعان جاقىندارىن ىزدەپ الەۋمەتتىك جەلىدە جازبا قالدىرعان بولاتىن. ول جازبا بۇكىل ينتەرنەتتى كەزىپ، قازاقستاندىقتار جاپپاي ماراتتىڭ تۋىستارىن ىزدەپ كەتكەن. قارعا تامىرلى قازاق ەمەسپىز بە، ماراتتىڭ شىعىس قازاقستاندا تۇراتىن اعاسى دا تابىلدى. ءبىز جاقىندارىن ىزدەگەن بوزبالانىڭ وزىنە حابارلاسىپ، بۇل وقيعا جايلى از-كەم اعىلشىن تىلىندە (قازاقشا بىلمەيدى، ورىسشا ساناۋلى عانا ءسوز بىلەدى – رەد.) اڭگىمەلەستىك.

 – تەودور، الدىمەن ءوزىڭدى، سوسىن وتبا­سىڭدى وقىرمان قاۋىمعا تانىس­تى­را وتىرساڭ...

– ەسىمىم – تەودور ۋولتون. 2001 جىلى قازاقستانداعى وسكەمەن قالاسىندا دۇنيەگە كەلگەنمىن. تۋعاندا بەرىلگەن ەسىم – مارات توقتارۇلى ورازعاليەۆ. ءبىر جاسقا تولعا­نىمدا وسكەمەندەگى جەتىمدەر ۇيىنەن امە­ريكالىق وتباسى اسىراپ العان. وتبا­سىندا بەس ادامبىز. اكەم – امەريكا­لىق، ەسىمى – دونالد. اسكەري سالا قىزمەتكەرى. انام – جارتىلاي جاپوندىق، جارتىلاي امەري­كا­لىق، ەسىمى – دجينني. الەۋمەتتىك قىزمەتكەر بولىپ ەڭبەك ەتەدى. قاتەلەسپەسەم، ەكەۋى دە 53 جاستا عوي دەيمىن. ولار مەنىمەن قاتار، سول جەتىمدەر ۇيىنە تاپسىرىلعان تاعى ءبىر بالانى ياعني قازىرگى تاڭدا اپكەم اتانىپ جۇرگەن سارا ەسىمدى قىز بالانى دا ءوز قام­قورلىعىنا العان. سارا مەنەن ءۇش جاس ۇلكەن. قازىرگى تاڭدا كوللەدج ستۋدەنتى. وتباسىمىزدا سارا ەكەۋمىزدەن بولەك، اتا-انامنىڭ حاننا ەسىمدى تۋعان قىزدارى بار. ول قازىر ون التى جاستا، ورتا مەكتەپتە وقيدى.

– بىلۋىمشە، ءوزىڭ اقش-تاعى فلو­ريدا شتاتىنا قاراستى پەنساكولا قالا­سىنىڭ جەرگىلىكتى كوللەدجىندە بيولوگيا سالاسى بويىنشا ءبىلىم الىپ جاتىر ەكەنسىڭ؟

– باستاپقىدا بيولوگيا عىلىمىن تاڭداعانمىن. كەيىننەن بۇل سالانى ءتۇسىنۋ قيىنعا ءتۇستى، ءسويتىپ وقۋىمدى اۋىستىرىپ، قازىر بيزنەس جۇرگىزۋ جانە قىتاي ءتىلىن وقۋدامىن.

– ادەتتە بالا اسىراپ الاتىن امەري­كا­لىقتار ونىڭ اسىراندى ەكەنىن بالا كۇنىنەن جاسىرماي، بۇگە-شۇگەسىنە دەيىن ايتىپ، ءتىپتى تۋعان اتا-اناسىن ىزدەس­تىرۋگە بار كۇش-جىگەرىن سالىپ جاتا­دى. سەنىڭ دە اتا-اناڭ وسىنداي باستاما كوتەرگەن بولار؟

ء–يا، مۇندا بالا اسىراندى ەكەنىن بالا كەزىنەن بىلەدى. مەن دە كىشكەنە كەزىمنەن ءبىلدىم. انام دا، اكەم دە – وتە اشىق ءارى مەيىربان كىسىلەر. ەشقايسىمىزدى ءبولىپ-جارمايدى، بارلىعىمىزعا بىردەي الاڭ­دايدى. اسىراندى ەكەنىمدى بىلسەم دە، باستاپقىدا ونشا ءمان بەرمەدىم. سوسىن اتا-انام 2008 جىلى تۋعان اكە-شەشەمدى ىزدەس­تىرە باستاعانى ەمىس-ەمىس ەسىمدە قا­لىپتى. سول كەزدە بۇعان كىشكەنە قىزىق­قا­نىم بار، بىراق بۇل ءىستى ارمەن قاراي جالعاستىرىپ اكەتپەدىك. سەبەبى مەن كىشكەنتاي بولدىم.

–2008 جىلى جاسىڭ نەبارى جەتىدە بولعاندىقتان، ىزدەستىرۋ ىسىنە اسا ءمان بەرمەيتىنىڭ تۇسىنىكتى جايت. ال ەسەيە كەلە ناقتى قاي كەزدە بۇل ىزدەستىرۋدى جال­عاستىرۋ كەرەك ەكەنىن ءتۇسىندىڭ؟ ءبىل­گىم كەلىپ تۇرعانى، اتا-اناڭنىڭ كومە­گىن­سىز، ىزدەۋدى ءوزىڭ باستاپ كەتۋگە نە تۇرتكى بولدى؟

– ناعىز قىزىعۋشىلىعىمنىڭ ويانۋىنا سەبەپكەر بولعان جايت – قازاقستاندىق رەجيسسەر قانات بەيسەكەەۆتىڭ اسىراندى بالالار تۋرالى تۇسىرگەن دەرەكتى ءفيلمى. بۇل ءفيلمدى ونىڭ Youtube پلاتفور­ما­سىن­داعى پاراقشاسىنان كەزدەيسوق كورىپ قالدىم. ونىڭ ۇستىنە، مۇنداعى كەيىپ­كەر­لەر­دىڭ بىرنەشەۋىن تانيمىن. قاشان كورگە­نىمدى ۇمىتىپ وتىرمىن، دەسەك تە وسى فيلم­نەن سوڭ، تۋعان وتباسىم، قازاقستان تۋرالى تانىپ-بىلۋگە قۇشتارلىعىم ارتا ءتۇستى.

– ال بۇل دەرەكتى ءفيلمدى كورگەنگە دەيىن قازاقستان تۋرالى نە بىلەتىن ەدىڭ؟

– قازاقستان كوپتەگەن جىل بويى كەڭەس وداعىنىڭ قۇرامىندا بولعانىن بىلەتىن­مىن. سونىمەن قاتار ەل تۇرعىندارى قازاق جانە ورىس تىلىندە سويلەيتىنىن ءارى مۇسىل­مان ءدىنىن ۇستاناتىن مەملەكەت ەكەنىن ءبىلدىم. سونداي-اق اۋماعى الەم بويىنشا توعىزىنشى ورىندا ەكەنىنەن حاباردارمىن. ايتا كەتەرلىگى، Facebook جەلىسىنە قالدىرعان جازبامنان سوڭ، دوس قاتارىنا قوسىلىپ جاتقان قازاقستان­دىق­تاردىڭ قاراسى كوپ. بىرەۋ «گەننادي گولوۆكيندى تانيسىڭ با؟» دەپ جازىپتى. شىنى كەرەك، ول كىسى تۋرالى ەشتەڭە بىلمەيدى ەكەنمىن. مەنىڭ بىلەتىنىم – ديماش قۇدايبەرگەن. سەبەبى ونى امە­ري­كادا كوپشىلىگى تانيدى، تىڭدايدى، ايتىپ جۇرەدى. العاش رەت ونىڭ قازاق ەكەنىن ەستى­گەنىمدە قاتتى قۋاندىم. قازاق بالا­سىنىڭ كۇللى الەمدى وزىنە قاراتىپ، نازار اۋدارت­قا­نىنا ماقتانامىن! ايتپاق­شى، شىققان تەگىم مەن اتاجۇرتقا دەگەن قىزىعۋشى­لى­عىمنىڭ ويانۋىنا جوعارىدا ايتىپ وتكەن دەرەكتى فيلم ءبىرىنشى سەبەپ بولسا، ەكىنشى سەبەپ – وسى ديماش. ونىڭ ءومىرىن، ونەرىن تاني تۇسكەن سايىن، قازاقستان تۋرالى كوپ بىلگىم كەلدى. الەۋمەتتىك جەلىدەن قازاق­ستانعا قاتىسى بار پاراقشا تاۋىپ الدىم دا، الگى جازبامدى جاريالادىم.

– Facebook جەلىسىندەگى Kazakh American Association توبىنىڭ پاراق­شا­سىنا قالدىرعان سول جازباڭا ورالساق. بۇل جازبادا ءوزىڭ تۋرالى قىس­قا­شا مالىمەتپەن قاتار، بىرنەشە سۋرەتتى قوسا جۇكتەپسىڭ. وسى سۋرەت­تەردىڭ تاريحى تۋرالى ايتا وتىر­ساڭ؟ بۇل سۋرەتتەر سەندە قايدان ءجۇر؟

– جوعارىدا ايتىپ وتكەنىمدەي، 2008 جىلى اتا-انام ىزدەستىرۋدى باستاعان. كەيىن­نەن تيەسىلى مەكەمە بىزگە وسى سۋرەتتەردى تاپسىردى. سول سۋرەتتەردىڭ بىرىندە مەنىڭ اپكەم جانە اعام دەپ جازىلعان. ءسويتىپ، اعاممەن قوسا، اپكەم دە بار ەكەن دەپ، ەكەۋى­نە بىردەي ىزدەۋ سالدىم. بەلگىلى بولعان­داي، مەنىڭ تەك ءبىر عانا باۋىرىم بار ەكەن، ال سۋرەتتەگىلەردىڭ قالعانى تۋىسقاندارىم ەكەن. ءسوزدىڭ شىنى كەرەك، سول جازبام وسىنشالىقتى رەزونانس تۋدىرادى دەپ ەش ويلامادىم. كادىمگى جاي حابارلاما سەكىلدى جۇكتەي سالدىم. بىرەۋ كومەكتەسەر-كومەك­تەس­پەس، دەسەك تە كوپشىلىگى مەنىمەن شارۋاسى بولمايتىن شىعار دەپ ويلادىم. جۇكتەگە­نىم سول-اق، پىكىر بىلدىرۋشىلەر مەن جەكە حابار­لاما جىبەرۋشىلەر كوبەيىپ كەتتى. ەرەكشە قولداۋعا يە بولدىم. شىنىمدى ايتسام، قازاقتار  اشىق، مەيىرىمدى ەكەن. بالا كەزدە وزگە ۇلت ەكەنىڭدى بىلسەڭ دە، بايىبىنا بارىپ تۇسىنە بەرمەيسىڭ عوي. قازىر بارلىق جايتتى ەسكەرە وتىرا، قازاق ۇلتىنان تارايتىنىمدى ەرەكشە ماقتان تۇتامىن!

– سول جازبانىڭ استىنا قازاق دوستا­رىڭ جوق ەكەنىن، الداعى ۋاقىتتا قازاقتارمەن بايلانىستا بولعىڭ كەلەتىنى تۋرالى پىكىر قالدىرىپسىڭ. باي­قاعانىمداي، سوڭعى ءبىر اپتادا قازاق دوستارىڭنىڭ قاتارى كوبەيگەن سەكىلدى...

– ءيا، سودان كەيىن دوستىق نيەتىن ءبىل­دىرىپ جاتقاندار كوپ. ءالى دە جازۋدا، قولداۋ ءبىل­د­ىرۋدە، ەلگە شاقىرۋدا. اراسىندا قازاق­ستان جانە ەلدىڭ مادەنيەتى تۋرالى كوپ اقپارات جىبەرۋدە. امەريكادا تۇراتىن قازاقتار دا حابارلاستى. ايتپاقشى، قازاق دوسىم جوق دەگەنىمدە قازاقستاننان دەگەندى مەڭ­زەگەن ەدىم. سەبەبى امەريكاداعى ەڭ جا­قىن دوسىم دا قازاق. سايكەستىكتى قارا­ڭىز، مەنىمەن ءبىر قالادا، سونىڭ ىشىندە كورشىلەس اۋداندا تۇراتىن ونى دا مەنى اسىراپ العان جەتىمدەر ۇيىنەن وسى ەلگە اكەلىپتى. سول سەبەپتى ەكەۋىمىزگە ورتاق دۇنيە بارشىلىق. اينىماس دوسپىز قازىر. بىلۋىمشە، ول دا مەن سەكىلدى ءوزىنىڭ باۋىرىن تاۋىپ العان سەكىلدى.

– ەندىگى كەزەكتە ءوز باۋىرىڭ رۇستەم­دى ءسوز ەتسەك. سول جازباڭنان كەيىن ارا­دا ءبىر كۇن وتەر-وتپەس ۋاقىتتا تا­بىل­عان رۇستەم جاۋاپ قاتقاندا قانداي كۇيدە بولدىڭ؟

– باستاپقىدا قاتتى تاڭعالدىم. سەبەبى تەز تابىلدى. 18 مامىر كۇنى جازبا قال­دىر­دىم. ەرتەسى 19 مامىر تاڭەرتەڭ ۇيقىدان تۇر­سام، اعام بايلانىسقا شىعىپ تۇر. ودان بولەك، جان-جاقتان حابارلاما تولاسسىز كەلۋدە. «بۇلاي مۇمكىن بە؟» دەپ لەزدە تابىلعانىنا تاڭعالىپ، باستاپقىدا اعام ەكەنىنە سەنبەگەنىم بار. دەسەك تە، سۋرەتتەن بايقاساڭىز، اعام ەكەنىن ءتۇرىمىز-اق ايتىپ تۇر. ۇقسايمىز. كەيىننەن ماتىندىك حابار­لاما ارقىلى جازىسقاندا قۋانى­شىم­دا شەك بولمادى. قاتتى قۋاندىم. دەسەك تە، بىردەن ەمىن-ەركىن سويلەسىپ كەتە قويمادىق. جارتىلاي سوزدىك ارقىلى، جارتىلاي ورىسشا سويلەستىك.

– ورىس ءتىلىن قايدان بىلەسىڭ؟

– كوللەدجدە ورىس ءتىلىن ۇيرەتەتىن ساباق بار. سودان ۇيرەنگەنمىن. تۇتاس سويلەمدى تولى­عىمەن تۇسىنە الامىن دەپ ايتا الماي­مىن. دەگەنمەن اعامنىڭ كەيبىر قىسقارتىپ جازعانىن سوزدىككە جۇگىنبەي-اق ءتۇسىنىپ وتىردىم.

– تاعى دا سول جازباڭنىڭ استىنا اناڭ­دى ىزدەستىرىپ، اناڭمەن اتى-ءجونى ءبىر ءارى ۇقسايدى-اۋ دەگەن كىسىلەردىڭ سۋ­رە­­تىن جىبەرگەن جەلى قولدانۋشى­لا­رىنا «وكىنىشكە قاراي، ىزدەستىرۋ بارى­سىن­دا ول كىسىنىڭ ومىردەن قايتقانىن بىلدىك. دەسەك تە، كومەگىڭىزگە مىڭ العىس» دەپ جاۋاپ قايتارىپسىڭ. ال اكەڭ تۋرالى قانداي مالىمەت بىلەسىڭ؟

– انام جاناردىڭ قايتىس بولعانىن امەريكالىق اتا-انام باياعىدا ايتقان-تىن. ال اكەم توقتاربەكتىڭ دە قايتىس بولعانىن جۋىر­دا، اعام تابىلعان سوڭ ءبىلدىم. وعان دەيىن ول كىسى تۋرالى ەش اقپارات بىلمەي­تىن­مىن.

– اعاڭمەن حات-حابار الماسقاندا وسكە­مەندە قالعان ول ءومىرىنىڭ ارى قاراي قالاي وربىگەنى تۋرالى ايتتى ما؟

– ءيا، ەكەۋىمىز ءومىرىمىز تۋرالى جازىس­تىق. قازىرگى تاڭدا شىعىس قازاقستان وبلى­سى كۇرشىم اۋدانىندا تۇرادى ەكەن. جاسى 21-دە. ءوزىن سول جاقتاعى كەرەمەت ءبىر وتباسى اسىراپ العانىن ايتتى. جەتىنشى سىنىپتا وقىپ جۇرگەنىندە مەنىڭ بار ەكەنىمدى ءبىلىپتى. سونىمەن قاتار قازىرگى تاڭدا مەشىتتە جۇ­مىس ىستەيتىنىن بىلەمىن. جوعارىدا ايتىپ وتكەندەي، قازاقستان مۇسىلمان ەل ەكەنىن بىلەمىن. دەسەك تە، مەشىت جانە اعامنىڭ جۇمىسىنا قاتىستى ەشتەڭە بىلمەيمىن. مۇمكىن اعاممەن كەزدەسكەن كەزدە بۇل تۋراسىندا كەڭىنەن سۇراپ الارمىن. قازىرگى پاندەمياعا بايلانىستى وسى جازدا وعان بارۋعا جول جوق ەكەنىن جاقسى تۇسىنەمىن، دەسەك تە الداعى  جىلى  ساياحاتتاپ بارۋدى جوسپارلاپ وتىرمىن. ازداپ قوبالجۋ بار.

– سوزىڭە قاراسام، ماتىندىك حابار­لا­ما ارقىلى سويلەسىپ جۇرگەنىڭە ونشا ريزا ەمەس سەكىلدىسىڭ. تەلەفون نەمەسە بەينەقوڭىراۋ شالعىڭ كەلىپ ءجۇر مە؟

– تۋعان اعاڭمەن دۇرىس تۇسىنىسە الما­عان­دىقتان كوڭىلىمنىڭ كىشكەنە تۇسەتىنى راس. ساعاتتاپ تۇرىپ سويلەسكىم كەلەدى، جاقىن­نان تانىعىم كەلەدى، ەش كەدەرگىسىز  ءبىر-ءبىرىمىزدى ءتۇسىنىپ، جاقىن تارتساق دەيمىن. قازىر مەنى الاڭداتىپ تۇرعانى وسى. دەسەك تە، ءبىر كۇنى قازاقشا جانە ورىسشا ەركىن سويلەيتىنىمدى بىلەمىن. ول دا شەت ءتىلىن ۇيرەنىپ الار. ايتپاقشى، قازاق تىلىندە  تىڭدادىم. تۇسىنگەنىم، مۇنى يگەرۋ قيىنعا سوعاتىن سەكىلدى. سەبەبى ءبىر قاراعانعا كۇردەلى ءتىل سەكىلدى كورىندى. كەلەر جىلى قازاقستانعا بارعانعا دەيىن قانشا قيىن بولسا دا، ءبىراز سوزدەر جاتتاپ الارمىن.

– اسىراپ العان اتا-اناڭ باۋى­رىڭ­دى تاپقانىڭدى قالاي قابىلدادى؟

– ول كىسىلەرمەن بىرگە تۇراتىندىقتان، ولار بار­لىعىن ەستىپ، كورىپ، ءبىلىپ ءجۇردى. سوسىن اعام تابىلعاندا ەكەۋىنە: «انا، اكە، قاراڭىزدار، باۋىرىم­دى تاپتىم!» دەپ سۋرەتىن كور­سەت­تىم. ولار دا مەن سەكىلدى قاتتى قۋاندى. ونىڭ ۇستىنە بۇل ءىستى 2008 جىلى وزدەرى باستاعان ەدى. قۋانباۋى مۇمكىن ەمەس. ولار دا اعامنىڭ ومىرىنە الاڭدايدى.

– قازاقستانعا كەلىپ، اعاڭ­مەن قاۋىشۋدان ءبو­لەك، العا قانداي جوس­پار قۇرۋداسىڭ؟

– كوللەدج بىتىرگەن سوڭ بيزنەس سالاسىندا، سونىڭ ىشىندە تەحنولوگيا بيزنەسى بويىنشا جۇمىس ىستەگىم كەلەدى. بالكىم، حالىقا­رالىق كومپانيالاردا قىزمەت ەتەرمىن. قازىرگى تاڭدا امەريكادا ازيا مادەنيەتى كەڭ تاراعان، ادامدى قىزىقتىرماي قويمايدى. الداعى ۋاقىتتا ورىس، قازاق تىلىمەن قاتار، قىتاي، كارىس ءتىلىن ۇيرەنىپ، سول بويىنشا ەڭبەك ەتۋگە قاتتى قىزىعامىن. نەگىزى، ارمانىم كوپ.

– ايتپاقشى، Facebook-تەگى جەكە پرو­فيلىڭدە تۋعان قالاڭ رەتىندە نۇر-سۇل­تان قالاسىن بەلگىلەپ قويىپسىڭ. دەمەك، كەلەر جىلى وسكەمەننەن كەيىن نۇر-سۇلتانعا جول تارتۋ ويىڭدا بار عوي؟

– بايقاپ قويدىڭىز با؟!(كۇلىپ). نەگىزىن­دە باستاپقىدا پروفيلىمە وسكەمەندى بەلگى­لەپ قويعانمىن. سوسىن نۇر-سۇلتانعا اۋىس­تىردىم. مۇنداعى ماقسات – قازاق­ستان­نان كوپ دوس تابۋ. جاڭىلىسپاپپىن، سودان كەيىن كوپ دوس تاپتىم. البەتتە، جولاي نۇر-سۇلتانعا سوققىم كەلەدى. نۇر-سۇلتان تۋرالى سوڭعى ۋاقىتتا كوپ نارسە ءبىلدىم. اتاپ ايتسام، بىلتىر اتاۋى اۋىسقانىن، نۇر-سۇلتان ەلدىڭ ءبىرىنشى استاناسى ەمەس ەكەنىن، قالانىڭ ارحيتەكتۋراسى زاماناۋي ستيلدە سالىنعانىن ءبىلدىم.

– ال تۋعان جەرىڭ وسكەمەن قالاسى تۋرالى نە ءبىلدىڭ؟

–ينتەرنەتتەن قالا سۋرەتتەرىن ارنايى ىزدەگەنمىن. بايقاعانىم، وسكەمەن نۇر-سۇلتان نەمەسە الماتى سەكىلدى زاماناۋي ەمەس، وزىندىك كولوريتى بار قالا سەكىلدى. سوسىن مۇندا قازاقتىلدى ورتامەن قاتار، ورىسشا سويلەيتىندەر كوپ تۇراتىنى تۋرالى وقىدىم. سوڭعى اپتادا كوپتەگەن كىسى الەۋمەتتىك جەلى ارقىلى وسكەمەننىڭ مەن كورمەگەن سۋرەتتەرىن جىبەرىپ جاتىر. راسىمەن ادەمى قالا ەكەن!

– سول وسكەمەننەن سەنىمەن بىرگە اسىراپ الىنعان سارا اپكەڭ ءوز اتا-اناسىن ىزدەۋگە قىزىعۋشىلىق تانىتىپ جاتقان جوق پا؟

– سارادا مەندەگىدەي ۇلكەن قىزىعۋ­شى­لىق جوق. ونىڭ ۇستىنە، ونىڭ وتباسى تۋرالى كوپ اقپارات تا جوق. سودان كەيىن دە بولار، ول ونشا قىزىقپايدى. دەگەنمەن مەنىڭ حيكايامدى كورىپ، ەستىپ جۇرگەن ول ءبىر كۇنى قىزىعاتىنى انىق دەپ ويلايمىن.

– اعاڭ رۇستەمگە نە ايتار ەدىڭ؟

– «اعا، سەنى قاتتى ساعىنامىن. بۇدان كەيىن ەكەۋمىز ەشقاشان اجىراپ، ەكى جاققا ءبولىنىپ كەتپەسەك ەكەن دەيمىن. مەيلى، ءتىلدى ءجوندى بىلمەسەك تە، مەيلى الەم­نىڭ ءار بۇرىشىندا جۇرسەك تە، ارا­قاتىناسىمىز ەندى ۇزىلمەسىن! بارلى­عى كەرەمەت بولادى دەپ سەنەمىن! مەنى كۇت!» دەگىم كەلەدى.

 

سۇحباتتاسقان

ءاليا تىلەۋجانقىزى

سوڭعى جاڭالىقتار