27 مامىر, 15:31 941 0 جاڭالىقتار اسىل تۇمار

باس مەملەكەتتىك سانيتارلىق دارىگەردىڭ وكىلەتتىگى ارتادى – پرەزيدەنت

سۋرەت عالامتوردان الىندى
سۋرەت عالامتوردان الىندى

قر پرەزيدەنتى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ 3-وتىرىسىندا باس مەملەكەتتىك سانيتارلىق دارىگەردىڭ مارتەبەسى مەن وكىلەتتىگى ارتتىرىلاتىنىن ايتتى. 

«بۇگىندە بارلىق ەل قاۋىپسىزدىگىنىڭ ماڭىزدى بولىگى – بيولوگيالىق قاۋىپسىزدىك ماسەلەسى بولىپ وتىر. بۇعان دەيىن كوروناۆيرۋستىڭ قايتا تارالۋىنا دايىن بولۋعا ءتيىس ەكەندىگىمىزدى ايتقان بولاتىنمىن. احۋال ەلىمىزدىڭ جانە كورشىلەس مەملەكەتتەردىڭ اۋماعىندا تۇراقتى تابيعي وشاقتار مەن وزگە دە قاۋىپتى ينفەكتسيالاردىڭ بولۋىنا بايلانىستى كۇردەلەنە تۇسۋدە. بىرقاتار جۇيەسىز رەفورمالار مەن قايتا ۇيىمداستىرۋلار سانيتارلىق-ەپيدەميولوگيالىق قادالاعاۋ جانە ينفەكتسيالىق باقىلاۋ جۇيەلەرىنىڭ السىرەۋىنە سەبەپ بولدى»، – دەدى مەملەكەت باسشىسى.

بۇل رەتتە قر پرەزيدەنتى سانيتارلىق-ەپيدەميولوگيالىق قىزمەتتى كۇشەيتۋ قاجەتتىگىنە باسا نازار اۋدارتتى.

«وسىعان وراي قازىردىڭ وزىندە جاڭا كوميتەتتى قۇرۋ جۇمىسى باستالدى. باس مەملەكەتتىك سانيتارلىق دارىگەردىڭ مارتەبەسى مەن وكىلەتتىگى ارتتىرىلاتىن بولادى. ءومىردىڭ ءوزى بۇل رەفورماعا تۇرتكى بولىپ وتىر. بۇل قىزمەتتىڭ ماماندارىن الەۋمەتتىك قورعاۋ جانە كادرلاردى دايىنداۋ جۇيەسى قايتا قارالادى. بۇعان قوسا، ينفەكتسيالىق اۋرۋلارمەن كۇرەس سالاسىندا شەت ەلدەرمەن ىنتىماقتاستىقتى ودان ارى نىعايتۋ قاجەت. بيولوگيالىق قاۋىپسىزدىك جۇيەسى ورتاق ستاندارت بويىنشا جۇمىس ىستەۋى جانە قاتەرلەرگە ەلارالىق ءوزارا ءىس-قيمىل مەن قارسى تۇرۋ شارالارىن قامتاماسىز ەتۋى ءتيىس»، – دەپ اتاپ ءوتتى قاسىم-جومارت توقاەۆ.

سونىمەن قاتار مەملەكەت باسشىسى قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى زاڭدى جىل سوڭىنا دەيىن قابىلداۋ قاجەتتىگىن باسا ايتتى.

سوڭعى جاڭالىقتار