25 مامىر, 14:05 1016 0 جاڭالىقتار اسىل تۇمار

1-سىنىپقا قۇجات قابىلداۋ 1 ماۋسىمنان باستالادى

سۋرەت عالامتوردان الىندى
سۋرەت عالامتوردان الىندى

جاڭا وقۋ جىلىندا 1-سىنىپقا قۇجات قابىلداۋ 2020 جىلدىڭ 1 ماۋسىم مەن 30 تامىزى ارالىعىندا جۇزەگە اسادى.

ءبىلىم جانە عىلىم مينيسترلىگىنىڭ حاباراۋىنشا، ءبىرىنشى سىنىپقا بالالاردى قابىلداۋ ءۇشىن قۇجاتتار ءتىزىمىن تولىق وتكىزۋ قاجەت. ولار:

  • بالانىڭ اتا-اناسىنان (زاڭدى وكىلدەرىنەن) ءوتىنىش (ەركىن تۇردە);
  • بالانىڭ تۋ تۋرالى كۋالىگىنىڭ كوشىرمەسى;
  • بالا دەنساۋلىعى پاسپورتى (026/ۋ-3 فورما، 063/ۋ نىسان بويىنشا دەنساۋلىق جاعدايى تۋرالى قۇجات);
  • 3x4 كولەمىندەگى فوتو.

جاقىندا نۇر-سۇلتان قالاسىنىڭ ءبىلىم باسقارماسىنىڭ باسشىسى شولپان قادىروۆا جاڭا وقۋ جىلىندا 1-ءشى سىنىپقا قابىلداۋ، مەكتەپتەن مەكتەپكە، سىنىپتان سىنىپقا اۋىستىرۋ ماسەلەسى قالاي رەتتەلەتىنىن ايتىپ بەرگەن بولاتىن.

«بالالاردى ءبىرىنشى سىنىپقا قابىلداۋ، مەكتەپتەن مەكتەپكە، سىنىپتان سىنىپقا اۋىستىرۋ قىزمەتى EGOV.kz ەلەكتروندىق ۇكىمەت پورتالى ارقىلى اۆتوماتتاندىرىلعان. اتا-انالار پورتالدىڭ «ءبىلىم بەرۋ» بولىمىندە «ورتا ءبىلىم بەرۋ» ءبولىمىن تاڭداۋ ارقىلى كىرىپ، ءوتىنىش بەرىپ، قاجەتتى قۇجاتتاردى تىركەيدى. قۇجات تاپسىرۋ مەرزىمى – 15 مينۋت. مەملەكەتتىك قىزمەت كورسەتۋ نىسانى – ەلەكتروندى. اتا-انانىڭ جەكە كابينەتىنە بالانى قابىلداعان نەمەسە قابىلداماعانى سەبەبى تۋرالى حابارلاما كەلەدى»، – دەگەن بولاتىن شولپان قادىروۆا نۇر-سۇلتان قالاسى اكىمدىگىنىڭ Facebook پاراقشاسىندا ونلاين رەجيمدە وتكەن ءباسپاسوز ءماسليحاتىندا.

ەرەكشە ءبىلىم بەرۋدى قاجەت ەتەتىن بالالاردى ءبىلىم بەرۋ ۇيىمدارىنا وقۋعا قابىلداۋ ءۇشىن زاڭدى وكىلدەردىڭ كەلىسىمىمەن پورتالعا قوسىمشا پەداگوگيكالىق-مەديتسينالىق-پسيحولوگيالىق كوميسسيانىڭ قورىتىندىسى ەلەكتروندى تۇردە (سكانەرلەنگەن نۇسقاسى، فوتو)  ۇسىنىلادى.

«مەكتەپتىڭ قابىلداۋ كوميسسياسى وقۋعا ءوتىنىش بەرگەن كەزدە باسقا قوسىمشا قۇجاتتاردى تالاپ ەتپەۋى ءتيىس. جاڭا وقۋ جىلىنا دايىندىق ماقساتىندا 17 تامىزدان باستاپ مەكتەپتەردە اتا-انالاردىڭ قالاۋى بويىنشا اقىسىز نەگىزدە جازعى مەكتەپ جۇمىسىن وتكىزۋ جوسپارلانۋدا»، – دەدى ول.

كەز-كەلگەن وزگەرىستەر تۋرالى اقپارات رەسمي سايتتا جانە الەۋمەتتىك جەلىلەردە حابارلانادى.

سوڭعى جاڭالىقتار