23 مامىر, 13:21 1597 0 جاڭالىقتار اسىل تۇمار

پرەزيدەنت كەڭەسشىسى تەڭگەنى تسيفرلاندىرۋدى ۇسىندى

پرەزيدەنتتىڭ كەڭەسشىسى باعدات مۋسين تەڭگەنى تسيفرلاندىرۋدى ۇسىندى. ول سىبايلاس جەمقورلىققا قارسى ارنايى مۇنداي جاڭاشىل ءتاسىل قۇرىلسا، ادامداردىڭ زاڭعا سايكەس جۇمىس ىستەپ، مويىنسىنۋدان باسقا امالى قالمايتىنىن ايتادى.

قازاقپاراتتىڭ جازۋىنشا، سىبايلاس جەمقورلىققا قارسى اگەنتتىكتە وتكەن بريفينگتە ب.مۋسين: «مەن پروتسەستەردى تسيفرلاندىرۋ تۋرالى عانا ويلامايمىن. مىسالى، مەملەكەتتىك ساتىپ الۋ كەزىندە اقشانى قولما-قول شىعارۋ الۋ ماسەلەسى بار. مەملەكەتتىك ساتىپ الۋدى ۇتىپ العاننان كەيىن ونى اقشاعا اينالدىرۋ كەرەك. مۇنىڭ ءبارى الدىن الۋ ماقساتىندا تسيفرلىق باقىلاۋ ورناتپاۋدان بولىپ وتىر. ونى اقشاعا اينالدىرعاننان كەيىن بارىپ انىق-قانىعىن بىلەمىز. مەنىڭ يدەيام بويىنشا تەڭگەنىڭ تسيفرلىق انالوگى بولۋى كەرەك جانە ول بويالعان بولۋى قاجەت»، – دەپ اتاپ ءوتتى.

ونىڭ ايتۋىنشا، مىسالى، كوپىر قۇرىلىسىنا 3 ملرد تەڭگە بولىنسە، ءار تەڭگە تسيفرلاندىرىلعاندىقتان، ول مونيتور جۇيەسىندە كورىنىپ تۇراتىن بولادى.

«بۇعان ۋاقىت كەرەك. بۇل بيتكوين انالوگى، بىراق بيتكويننىڭ ءوزى ەمەس. ەكەۋىن شاتاستىرۋعا بولمايدى. ونى بيتكوين سياقتى جۇزەگە اسىرۋ قيىن ەمەس. بيتكويننىڭ تەحنولوگياسى جاقسى، ءبىز ونىڭ پايدالىسىن عانا الۋىمىز كەرەك»، – دەيدى پرەزيدەنت كەڭەسشىسى.

ونىڭ ايتۋىنشا، سىبايلاس جەمقورلىققا قارسى مۇنداي قۇرال قۇرىلعان جاعدايدا كوپتەگەن جەمقورلىق فاكتىلەرىنىڭ الدىن الۋعا بولادى.

«ادامدار زاڭ بويىنشا جۇمىس ىستەۋ كەرەك ەكەنىن ءتۇسىنۋى كەرەك. مۇنىڭ ءبارىن 2-3 جىلدا جۇزەگە اسىرۋعا بولادى. 1 جىلدا ىسكە اسىرۋعا بولاتىن وڭايىراق ءتاسىل بار. ەكىنشى دەڭگەيلى بانكتەرمەن، ۇلتتىق بانكپەن سويلەسۋ كەرەك. بۇل بىردەن بولادى دەپ ايتۋ قيىن، بىراق تسيفرلاندىرۋ جۇمىس تارتىبىندە تۇر، سوندىقتان ونى نەگە قازىردەن باستاپ قولعا الماسقا؟»، – دەيدى باعدات مۋسين.

سوڭعى جاڭالىقتار