22 مامىر, 16:32 3604 0 ءبىلىم انار لەپەسوۆا

شىمكەنتتە بالاباقشالار قاشان اشىلاتىنى بەلگىلى بولدى

شىمكەنت قالالىق ءبىلىم باسقارماسىنىڭ باسشىسى جانات تاجيەۆا قالادا بالاباقشالاردىڭ جۇمىسى قاشان جانداناتىنىن ايتتى. 

جانات تاجيەۆانىڭ سوزىنشە، بالاباقشالار 25 مامىردان باستاپ اشىلادى.

باسقارما باسشىسى مەكتەپكە دەيىنگى مەكەمەلەرگە بالالاردى قابىلداۋى بويىنشا جاڭا الگوريتم قابىلدانعانىن جەتكىزدى.  وعان سايكەس، بالاباقشاعا بارعىسى كەلەتىن بالالار مەن ونداعى تاربيەشىلەردەن دەنساۋلىعى تۋرالى انىقتاما تالاپ ەتىلەدى.

«الگوريتمگە سايكەس، ءبىرىنشى كەزەكتە بالانى پەدياتردىڭ انىقتاماسىمەن قابىلدايتىن بولامىز. بالانىڭ دەنساۋلىعى جاقسى ەكەنىن دالەلدەيتىن قۇجاتتاردى سۇرايمىز. سونىمەن قاتار، بالاباقشاداعى قىزمەتكەرلەردىڭ دە دەنساۋلىقتارى جونىندە ارقايسىسىنان انىقتاماسىن تالاپ ەتەمىز. بۇدان بولەك، اتا-اناسى نەمەسە ولارمەن قارىم-قاتىناستاعى تۋىستارىنىڭ دا ساۋلىعى جازىلعان قۇجاتتارىن سۇراتىپ، ارنايى تەكسەرۋدەن كەيىن عانا بالالاردى بالاباقشاعا كىرگىزەمىز»،- دەدى جانات تاجيەۆا.

باسقارما باسشىسى ءار توپتاعى بالا سانى 15-تەن اسپايتىنىن ايتتى. قازىرگى كەزدە وسى ماقساتتا ارنايى ءتىزىم جاساقتالا باستاعان.

بالاباقشاعا كەلۋشى بۇلدىرشىندەر مەن بارشا قىزمەتكەرلەردىڭ ءسات سايىن دەنە قىزۋى تەكسەرىلىپ، قولدارى ارنايى انتيسەپتيكتەرمەن زالالسىزداندىرىلۋى ءتيىس. سونداي-اق، ساقتىق شارالارى ءۇشىن بالالاردىڭ ارا قاشىقتىعى ساقتالىپ، بالاباقشا اۋماعى، عيماراتتىڭ ءىشى مەن سىرتىندا دەزينفەكتسيا جۇمىستارى جۇرزىگىلمەك.

ايتا كەتەيىك، ىندەتتىڭ تارالۋىنش شەكتەۋ ماقساتىندا شىمكەنتتە مەيرامحانالار مەن ءدامحانالار ازىرگە اشىلمايدى.

وتكەن تاۋلىكتە شىمكەنتتە 31 ادامنان كوروناۆيرۋس انىقتالىپ، قالادا ىندەت جۇقتىرعانداردىڭ جالپى سانى 539-عا جەتتى.

ال رەسپۋبليكا بويىنشا ءبىر كۇن ىشىندە 363 ادامنىڭ قاتەرلى ۆيرۋس جۇقتىرعانى بەلگىلى بولدى. ەلىمىزدە كوروناۆيرۋسقا شالدىققانداردىڭ جالپى سانى – 7597. ىندەت تارالعالى 35 ناۋقاس كوز جۇمدى.

سوڭعى جاڭالىقتار