22 مامىر, 16:15 411 0 دەنساۋلىق انار لەپەسوۆا

مينيستر كوروناۆيرۋسپەن كۇرەسىپ جاتقان ناۋقاستارمەن كەزدەستى

قر دەنساۋلىق ساقتاۋ ءمينيسترى ەلجان ءبىرتانوۆ الماتى قالاسىنا جۇمىس ساپارى اياسىندا جاڭادان سالىنعان جۇقپالى اۋرۋلار اۋرۋحاناسىنا بارىپ، كوروناۆيرۋس ينفەكتسياسىنان ەمدەلىپ جاتقان پاتسيەنتتەردىڭ جاعدايىن ءبىلدى. 

مينيسترلىكتىڭ ءباسپاسوز قىزمەتىنىڭ مالىمەتىنشە، ەلجان ءبىرتانوۆ مودۋلدىك كەشەندە ورنالاسقان «ي.س. جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسى» فيليالىندا ەڭبەك ەتىپ جاتقان دارىگەرلەرمەن جۇزدەستى جانە ناۋقاستاردىڭ دا جاعدايىن سۇرادى.

«گوسپيتالدا جاقسى جاعداي جاسالعان، ەمدەلۋدەمىز. مەديتسينا قىزمەتكەرلەرى وتە مۇقيات، ءاردايىم ءسوزىمىزدى جەرگە تاستامايدى جانە قيىن كەزدە ۇلكەن قولداۋ كورسەتتى»، - دەدى اناستاسيا زاحاروۆا (اتى-ءجونى وزگەرتىلدى).

مينيستر دە ناۋقاستىڭ تەز ساۋىعىپ كەتۋىن تىلەدى.

اتالعان جۇقپالى اۋرۋلار اۋرۋحاناسىندا 280 توسەك-ورىن، 6 كلينيكالىق بولىمشە، 28 توسەكتىك رەانيماتسيا بولىمشەسى بار. مەديتسينالىق جابدىقتار: رەنتگەن جۇيەسى، كومپيۋتەرلىك توموگرافيا، ۋلترادىبىستىق دياگنوستيكا اپپاراتتارى، ەندوسكوپيالىق جابدىقتار، وكپەنى جاساندى جەلدەتۋ اپپاراتتارى، مونيتورلار، پەرفۋزورلار جانە تاعى باسقالارى ورناتىلعان ءارى جۇمىس ىستەيدى.

ەلجان ءبىرتانوۆ، اسىرەسە الدىڭعى شەپتە جۇرگەن دارىگەرلەرگە ەرەكشە كوڭىل ءبولدى. مينيستر ارىپتەستەرىنە قيىن دا، جاۋاپتى ساتتە كورسەتكەن ادال قىزمەتتەرى ءۇشىن العىس ايتتى. سونداي-اق، ول مەديتسينا قىزمەتكەرلەرىنە ارنالعان قوسىمشا تولەمدەرگە قاتىستى ءسوز قوزعادى.

«ماعان جالاقىدان باسقا الەۋمەتتىك تولەمدەر ءبولىندى» - دەدى باس مەدبيكە سايراش ديكيموۆا مينيسترمەن اڭگىمە بارىسىندا.

 

سوڭعى جاڭالىقتار