22 مامىر, 12:07 311 0 دەنساۋلىق انار لەپەسوۆا

1 ماۋسىمنان نۇر-سۇلتانداعى بالاباقشالار قالىپتى رەجيمدە جۇمىس ىستەيدى

1 ماۋسىمنان باستاپ ەلورداداعى بالاباقشالار قالىپتى جاعدايدا جۇمىسىن باستايدى. بۇل تۋرالى نۇر-سۇلتان قالاسىنىڭ ءبىلىم باسقارماسىنىڭ باسشىسى شولپان قادىروۆا مالىمدەدى. 

«18 مامىردان باستاپ مەنشىك نىسانىنا قاراماستان بارلىق مەكتەپكە دەيىنگى ۇيىمدار سانيتارلىق-دەزينفەكتسيالىق رەجيمدى ساقتاي وتىرىپ، ءوز جۇمىستارىن ءبىرىنشى كەزەكتە بالانى ۇيدە قالدىرۋعا مۇمكىندىگى جوق، جۇمىس ىستەيتىن اتا-انالار ءۇشىن، اتا-انالاردىڭ قالاۋى بويىنشا «كەزەكشى توپتار» رەجيمىندە قايتا باستادى. بۇگىنگى كۇنى بالاباقشالاردا بالالار سانى – 4134. بۇل – جالپى بالالاردىڭ 7,4 پايىزى»، - دەدى باسقارما باسشىسى ەلوردا اكىمدىگىنىڭ Facebook پاراقشاسىندا ونلاين رەجيمدە وتكەن بريفينگتە.

شولپان قادىروۆا 1 ماۋسىمنان باستاپ بارلىق بالاباقشا مەن قوسىمشا ءبىلىم بەرۋ ۇيىمى شتاتتىق رەجيمدە، ياعني قالىپتى جاعدايدا جۇمىستارىن قايتا باستايتىنىن جەتكىزدى. باسقارما باسشىسىنىڭ ايتۋىنشا، مەكتەپكە دەيىنگى ءبىلىم بەرۋ ۇيىمدارىنداعى دايارلىق توپتارى 1 تامىزعا دەيىن بالاباقشاعا بارادى.

ايتا كەتەيىك، وتكەن تاۋلىكتە نۇر-سۇلتاندا 54 ادامنان كوروناۆيرۋس انىقتالىپ، ءوسىم 3,8 پايىزدىق قۇرادى.

ال رەسپۋبليكا بويىنشا ءبىر كۇندە 363 ادامنىڭ ىندەت جۇقتىرعانى بەلگىلى بولدى. ەلدە كوروناۆيرۋسقا شالدىققانداردىڭ جالپى سانى 7597-گە جەتتى.

سوڭعى جاڭالىقتار