22 مامىر, 09:47 216 0 جاھان انار لەپەسوۆا

بيىل ەۋرووداق ەكونوميكاسى 7,7 پايىزعا تومەندەيدى – ەۋروكوميسسيا

ەۋروكوميسسيا ەۋرووداق ەلدەرىنە ەكونوميكالىق ءوسىمدى قالپىنا كەلتىرۋ جولدارىن ۇسىندى.

نۇسقاۋلار جيىنتىعىندا  الەۋمەتتىك، ەكولوگيالىق جانە ەكونوميكالىق ماسەلەلەرمەن قاتار دەنساۋلىق ساقتاۋ سالاسىنىڭ تۇراقتى دامۋى مەن تسيفرلاندىرۋ جوسپارلارى قامتىلعان.

ەۋروكوميسسيا ۆيتسە-پرەزيدەنتى ۆالديس دومبروۆسكيستىڭ دەرەگىنشە، بيىل ەۋرووداق ەكونوميكاسى 7,7 پايىزعا تومەندەيدى. ىندەت كەزىندە تۇرالاعان ەكونوميكالاردى قالپىنا كەلتىرۋ جوسپارى بويىنشا بولىنەتىن قاراجات ءبىر تريلليون ەۋرودان اسۋى مۇمكىن. ۆيتسە-پرەزيدەنتتىڭ ايتۋىنشا، بۇل سوماعا نەسيەلەر مەن گرانتتار دا كىرەدى.

«قازىردىڭ وزىندە 30 ميلليوننان اسا ادام جارتىلاي ەڭبەك ەتىپ جاتىر. شۇعىل شارا قابىلداماساق، بۇل جاپپاي جۇمىسسىزدىققا ۇلاسۋى مۇمكىن. اقش-تا ءبىر اي ىشىندە ەڭبەك نارىعىنداعى جاعداي كۇرت ۋشىعىپ كەتتى. ەۋروپا بۇعان جول بەرمەۋى ءتيىس. ءبىز جاستار اراسىندا جۇمىسسىزدىقپەن كۇرەسكە باستى كوڭىل ءبولۋىمىز كەرەك. ەۋرووداقتىڭ كەيبىر ەلدەرىندە جاستاردىڭ جارتىسى ەكى قولىنا ءبىر كۇرەك تابا الماي ءجۇر»، - دەدى جۇمىسپەن قامتۋ ساۋالدارى جانە الەۋمەتتىك قۇقىقتار جونىندە ەۋروكوميسسار نيكوليا شميت.

كاسىپورىندار قىزمەتكەرلەرىن جۇمىستان شىعارماي، قايتا دايىنداۋ باعدارلامالارىن جۇزەگە اسىرۋ ءۇشىن 1 ماۋسىمدا 100 ميلليارد ەۋرو بولىنبەك. بۇل قاراجات ەسەبىنەن ەۋرووداق ەلدەرى جۇمىس بەرۋشىلەرگە جەڭىلدىكپەن نەسيە بەرەدى.

ايتا كەتەيىك، بۇعان دەيىن اقش-تا جۇمىسسىزدىق دەڭگەيى 14,7 پايىزعا جەتكەنىن حابارلاعانبىز. ەلدە 1948 جىلدان بەرى مۇنداي الاڭداتارلىق  كورسەتكىشتەر تىركەلمەگەن. سوڭعى رەت وسىعان ۇقساس جاعداي 1982 جىلى بولعان. الايدا ول ۋاقىتتىڭ وزىندە جۇمىسسىزدىق دەڭگەيى 10,8 پايىزدان اسپاعان دەيدى ماماندار.

سوڭعى جاڭالىقتار