21 مامىر, 19:43 263 0 دەنساۋلىق انار لەپەسوۆا

COVID-19: الماتىدا 2 ناۋقاستىڭ جاعدايى وتە اۋىر

بۇگىن الماتىدا كوروناۆيرۋس جۇقتىرۋدىڭ 57 جاڭا جاعدايى تىركەلىپ، قالادا ىندەتكە شالدىققانداردىڭ جالپى سانى 1966 ادامعا جەتتى. 

الماتى قالاسى قوعامدىق دەنساۋلىق ساقتاۋ باسقارماسىنىڭ باسشىسى تىلەۋحان ابىلداەۆتىڭ ايتۋىنشا، قازىرگى ۋاقىتتا قالالىق جۇقپالى اۋرۋلار ستاتسيونارىندا كوروناۆيرۋس ينفەكتسياسىنان 864 ناۋقاس ەم-دوم قابىلداپ جاتىر، ونىڭ 30 – بالا.

"ەكى ناۋقاستىڭ جاعدايى – وتە اۋىر، 22 ادامدا – اۋىر، 240 ناۋقاستا اۋىرلىقتىڭ ورتاشا دارەجەسى، ال قالعاندارىنىڭ دەنساۋلىعى قاناعاتتانارلىق. بۇگىنگى كۇنى پروۆيزورلىق گوسپيتالدا 196 ادام بار، 266 ادام كارانتيندە. 13 299 ازامات ءۇي كارانتينىندە جاتىر", - دەيدى باسقارما باسشىسى.

كەشە قالادا 55 ادام قاۋىپتى ىندەتتەن جازىلىپ شىققاگ. ونىڭ ىشىندە 28 ادام – مەديتسينا قىزمەتكەرلەرى، 1,5 جاس پەن 16 جاسقا دەيىنگى – 10 بالا، 68-73 جاستاعى ءۇش زەينەتكەر جانە قالعاندارى ورتا جاستاعى ازاماتتار. جالپى، شاھاردا پاندەميا باستالعالى بەرى قاۋىپتى ىندەتتەن 1092 ناۋقاس ساۋىعىپ شىقتى.

الماتىدا كارانتين رەجيمى اياقتالماعانىن ەسكە سالعان تىلەۋحان ابىلداەۆ تۇرعىنداردى ساقتىق شارالارىن ساقتاۋعا شاقىردى.

«مەگاپوليس تۇرعىندارىنا، اسىرەسە، جوتەل، مۇرىننان سۋ اعۋ نەمەسە باسقا دا اۋرۋ سيمپتومدارى بولعان جاعدايدا بارلىق قاۋىپسىزدىك شارالارىن ۇستانۋ كەرەكتىگىن ەسكەرتەمىز. اتاپ ايتقاندا، بەتپەردە كيىپ، مۇمكىندىگىنشە حالىق كوپ جينالاتىن ورىندارعا بارماۋعا، قولدى ءجيى جۋىپ، ادامداردان كەم دەگەندە 2 مەتر قاشىقتىقتا ۇستاۋ كەرەكتىگىن ءوتىنىپ سۇرايمىز. بۇل ۇسىنىستاردى ورىنداي وتىرىپ، ءسىز اۋرۋدىڭ تارالۋ قاۋپىن تومەندەتەسىز. ەگەر سىزدە دەنە قىزۋى كوتەرىلىپ، جوتەل پايدا بولسا، تىنىس الۋ قيىنداي تۇسسە، مەديتسينالىق كومەككە جۇگىنىپ، جەدەل جاردەم شاقىرعانىڭىز ابزال»، – دەدى ول.

ايتا كەتەيىك، ەلىمىزدە كوروناۆيرۋس جۇقتىرعانداردىڭ جالپى سانى 7234-كە جەتتى. وتكەن تاۋلىكتە 265 ادامنان ىندەت انىقتالىپ، ءوسىم 3,8% قۇرادى.

ال الەمدە كوروناۆيرۋس ينفەكتسياسىن 5 ميلليوننان استام ادام جۇقتىرعان. ولاردىڭ 328 مىڭنان استامى كوز جۇمدى.

 

سوڭعى جاڭالىقتار