21 مامىر, 13:39 398 0 دەنساۋلىق Túrkistan Gazeti

ەلوردالىق تەراپەۆت: ءار ادام ءوز دەنساۋلىعىنا جاۋاپتى بولۋدى ۇيرەنۋى كەرەك

بۇكىل الەمدى كوروناۆيرۋس پاندەمياسى جايلادى. جاڭالىقتاردا بۇل ىندەتكە شالدىققانداردىڭ ستاتيستيكاسى، ونىڭ الدىن الۋ شارالارى تۋرالى ءجيى ايتىلادى. ستاتسيوناردا قاۋىپتى دەرتپەن كۇرەسىپ جۇرگەن ەلوردالىق تەراپەۆت دارىگەر گۇلناز جۇمابەكقىزى ۆيرۋستان قورعانۋدىڭ نەگىزگى جولدارىن ايتىپ بەردى. 

 گۇلناز جۇمابەكقىزى، ءسىزدىڭ ستاتسيوناردا جۇمىس ىستەپ جۇرگەنىڭىزگە قانشا كۇن بولدى؟ قازىرگى جۇمىسىڭىز تۋرالى ايتىپ بەرسەڭىز. 

– 6 ناۋرىزدان باستاپ نۇر-سۇلتان قالاسىنداعى كوپسالالى مەديتسينا ورتالىعىنىڭ ينفەكتسيالىق بولىمىندە جۇمىس ىستەپ ءجۇرمىن. ءساۋىر، مامىر ايلارىندا ناۋقاستار كوبەيە باستادى. اۋىر جاعدايدا جاتقان ناۋقاستاردى تاۋلىك بويى باقىلاپ وتىردىق. قازىرگى جۇمىس ەمحاناداعى (نۇر-سۇلتان قالاسىنداعى № 1 قالالىق ەمحانا) كۇندەلىكتى جۇمىسىمنان ەرەكشەلەنەدى. اۋرۋحاناعا كەلىپ جاتقان پاتسيەنتتەردە باستاپقى كەزدە سترەسس، ۋايىم، قورقىنىش بولدى. سونداي قيىن كەزەڭدە ءبىر-بىرىمىزگە قولداۋ كورسەتۋدى ۇيرەندىك. اۋرۋحاناداعى پاتسيەنتتەرمەن كۇن سايىن سويلەسىپ، جاعدايىن ءبىلىپ وتىرامىز.  

كوروناۆيرۋس ينفەكتسياسىمەن كۇرەسۋدە قاراپايىم حالىق نەنى ەسكەرۋ كەرەك؟ 

 – جەكە گيگيەنانى ساقتاۋ، ماسكا، مەديتسينالىق قولعاپ كيۋ جانە قولدى مۇقيات جۋىپ ءجۇرۋ قاجەت. ەگەردە ءوزىڭىزدى جايسىز سەزىنەتىن بولساڭىز، تەز ارادا دارىگەرگە قارالعان ءجون.  مىسالى، دەنە قىزۋىنىڭ كوتەرىلۋى، مۇرىننىڭ بىتەلۋى، جوتەل، تاماق اۋىرعان كەزدە جەدەل جاردەم شاقىرۋ كەرەك. سىرتقا شىققان كەزدە وزىمەن بىرگە انتيسەپتيكالىق قۇرالداردى الىپ ءجۇرۋدى، قوعامدىق كولىكتەردە ماسكا كيۋدى ادەتكە اينالدىرۋ كەرەك.

مەملەكەت تاراپىنان كارانتين ايماعىندا جۇرگەن مەديتسينا قىزمەتكەرلەرىنە ۇستەمەاقى تولەنىپ جاتىر. ماتەريالدىق قولداۋدىڭ كەز كەلگەن مامانعا تىڭ سەرپىن بەرەرى ءسوزسىز. وسىعان بايلانىستى ءسىزدىڭ ويىڭىز قانداي؟ 

– مەنى وسى كارانتين اۋماعىنا جىبەرگەن ۋاقىتتا ۇستەمەاقى تولەنەتىندىگى تۋرالى ايتىلماعان ەدى. ارينە، بۇل جاڭالىق ۇلكەن قولداۋ بولدى.  ماتەريالدىق قولداۋدان تىس حالىقتىڭ دارىگەرلەرگە دەگەن سەنىمى جانە قۇرمەتى دە بىزگە مول كۇش-جىگەر بەرەدى. قازىرگى تاڭدا دارىگەر رەتىندەگى باستى مىندەتىمدى ابىرويمەن اتقارسام دەگەن ويىم بار. ويتكەنى كوروناۆيرۋستان ەمدەلىپ شىققان ءار پاتسيەنتتىڭ ايتقان العىسى بارىنەن دە قىمبات.

ءوز جۇمىسىڭىزدا قانداي ۇستانىمداردى ساقتاۋعا تىرىساسىز؟ 

– كەز كەلگەن جەردە جانە كەز كەلگەن ۋاقىتتا بارلىق ادامعا كومەك كورسەتۋگە تىرىسۋ. ماماندىعىمدى وسى ءۇشىن جاقسى كورەمىن. ادامدار دارىگەرگە ومىرىندەگى باعا جەتپەس بايلىعىن – دەنساۋلىعىن سەنىپ تاپسىرادى. بۇل جۇمىسىما دەگەن جاۋاپكەرشىلىكتىڭ جوعارى بولۋىن تالاپ ەتەدى. ودان بولەك جاڭا ءبىلىم ۇيرەنۋگە تىرىسامىن. سەبەبى دارىگەر ۇنەمى ىزدەنىس ۇستىندە ءجۇرۋى كەرەك.

كارانتين اياقتالعان سوڭ، ەڭ ءبىرىنشى كىمگە قوڭىراۋ شالاسىز؟ 

– اتا-اناما حابارلاسامىن. مۇمكىندىك بولسا وتباسىما بارىپ كەلەمىن. ولاردى كورمەگەلى ءبىراز ۋاقىت ءوتتى.

وسى تۇستا ءوزىڭىز تۋرالى ايتىپ وتسەڭىز.

– مەن 1994 جىلدىڭ 28 ناۋرىزىندا تۇركىستان وبلىسى، شاردارا اۋدانىندا دۇنيەگە كەلدىم. 2011 جىلى مەملەكەتتىك گرانتتى جەڭىپ الىپ، قاراعاندى مەملەكەتتىك مەديتسينا ۋنيۆەرسيتەتىندەگى «جالپى مەديتسينا» ماماندىعىنا وقۋعا ءتۇستىم. 2018 جىلى ۋنيۆەرسيتەتتەن تەراپەۆت ماماندىعىن الىپ شىقتىم. نۇر-سۇلتان قالاسىنداعى №1 قالالىق ەمحانادا تەراپەۆت بولىپ جۇمىس ىستەپ جۇرگەنىمە 2 جىل بولدى.

وتباسىڭىزدا سىزدەن باسقا دارىگەرلەر بار ما؟

– وتباسىمدا 4 قىز، 1 ۇل. اكەم اسكەري سالادا جۇمىس ىستەسە، انام –بۋحگالتەر. ۇيدە جالعىز دارىگەرمىن. ءوزىمدى تەك وسى ماماندىقتا عانا كوردىم. انام دارىگەردىڭ جۇمىسى قيىن ءارى اۋىر دەسە دە، مەديتسينانى تاڭدادىم. وعان ەش وكىنبەيمىن.

قازىرگى كارانتين كەزىندەگى حالىققا دارىگەر رەتىندە نە ايتار ەدىڭىز؟

– بۇل كۇندەر دە ارتتا قالادى. كارانتين كۇندەرى ءار ادام ءوز دەنساۋلىعىنا جاۋاپتى بولۋدى ۇيرەنسە ەكەن. مىنا نارسەنى ەستەن شىعارماۋ كەرەك. ءسىزدىڭ دەنساۋلىعىڭىز ­­– ءوز قولىڭىزدا! ءوزىڭىزدى ساقتاڭىز!

ۋاقىت ءبولىپ سۇحبات بەرگەنىڭىز ءۇشىن راقمەت!

 سۇحباتتاسقان بالجان سمايلوۆا

 

 

سوڭعى جاڭالىقتار