19 مامىر, 09:48 303 0 ەكونوميكا انار لەپەسوۆا

قازاقستاندا ونەركاسىپتى دامىتۋ قورى قۇرىلادى

سۋرەت ينتەرنەتتەن الىندى
سۋرەت ينتەرنەتتەن الىندى

ەلىمىزدە ونەركاسىپتى دامىتۋ قورى قۇرىلماق. بۇل تۋرالى بۇگىن ۇكىمەت وتىرىسىندا قر ۇلتتىق ەكونوميكا ءمينيسترى رۋسلان دالەنوۆ مالىمدەدى.

«ونەركاسىپتى دامىتۋ قورىن قۇرۋ ۇسىنىلادى. قور ارقىلى 3 پايىزدان ارتىق ەمەس مولشەرلەمە بويىنشا وڭدەۋشى كاسىپورىندارعا نەسيە بەرۋ جوسپارلانۋدا»، - دەدى مينيستر.

سونىمەن قاتار ول  ۇكىمەت وتاندىق وندىرۋشىلەردىڭ تاۋارلارىن وتكىزۋ بويىنشا بىرقاتار شارالاردى قولداعانىن ايتتى.

«بۇل - مەملەكەتتىك ساتىپ الۋدا كۆازيمەملەكەتتىك سەكتور مەن جەر قويناۋىن پايدالانۋشىلاردىڭ ساتىپ الۋىندا وففتەيك كەلىسىمشارتتار جاساۋ، جەڭىلدەتىلگەن قارجىلاندىرۋدى الۋشىلارعا وتاندىق ماتەريالدار مەن جابدىقتاردى پايدالانۋ بويىنشا مىندەتتەمەلەردى بەلگىلەۋ. ولار جەكە ينۆەستورلارمەن ليتسەنزيالىق كەلىسىمشارتتا بەكىتىلەتىن بولادى»، - دەدى رۋسلان دالەنوۆ.

ونىڭ اتاپ وتۋىنشە، اۋىل شارۋاشىلىعى تەحنيكاسىن ساتىپ الۋ كەزىندە ينۆەستيتسيالىق سۋبسيديالار بەرۋ تەتىگى جەتىلدىرىلەدى.

«ودان باسقا، جوعارى ەكسپورتتىق ءونىم وندىرۋشىلەردىڭ تاسىمالداۋ شىعىندارىن 80 پايىزعا دەيىن وتەۋدى ۇلعايتۋ جوسپارلانىپ وتىر. قوسىلعان قۇن سالىعىن جەدەل قايتارۋ اينالىم قاراجاتىن ۇلعايتۋعا ىقپال ەتەدى»، - دەدى مينيستر.

 

سوڭعى جاڭالىقتار