18 مامىر, 16:17 312 0 ەكونوميكا انار لەپەسوۆا

پاندەميانىڭ سالدارى: «قازمۇنايگازدىڭ» تابىسى 3 ەسە ازايعان

ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «قازمۇنايگاز» ۇلتتىق كومپانياسى» اق ادامي رەسۋرستاردى باسقارۋ جونىندەگى اتقارۋشى ديرەكتورى داۋلەتجان حاسانوۆ كومپانيادا داعدارىسقا قارسى ستراتەگيا جاسالىپ جاتقانىن ايتىپ بەردى.

«وزدەرىڭىز بىلەتىندەي، بۇعان دەيىن «قازمۇنايگاز» ۇلتتىق كومپانياسىنىڭ ورتالىق اپپاراتىندا جۇمىس ىستەيتىن قىزمەتكەرلەردىڭ سانى ازاياتىنى تۋرالى حابارلاعان بولاتىنبىز. كوروناۆيرۋس پاندەمياسىنا بايلانىستى مۇناي ونىمدەرىنە سۇرانىستىڭ تومەندەۋى كومپانيانىڭ قارجىلىق جاعدايىنا تەرىس اسەر ەتىپ وتىر. ءبىرىنشى توقساندا كومپانيانىڭ تابىسى وتكەن جىلدىڭ وسىنداي كەزەڭىمەن سالىستىرعاندا 3 ەسە ازايدى. الەمدىك نارىقتا مۇناي باعاسىنىڭ كۇرت قۇلدىراۋى سالدارىنان كەيبىر ەنشىلەس كاسىپورىندارىمىزدا قارجى تاپشىلىعى بايقالىپ وتىر»، - دەدى داۋلەتجان حاسانوۆ.

وسىعان بايلانىستى «قازمۇنايگاز» كومپانياسىندا داعدارىسقا قارسى ستراتەگيا جاسالۋدا.

«بۇل ستراتەگيا شىعىنداردى ازايتۋعا جانە داعدارىستان كەيىنگى كەزەڭدە مەكەمەنىڭ تەز ءارى ءتيىمدى دامۋىنا مۇمكىندىك بەرەدى. وسى شارالاردىڭ اياسىندا ديرەكتورلار كەڭەسىنىڭ شەشىمى نەگىزىندە كومپانيانىڭ جاڭا قۇرىلىمى بەكىتىلدى. وعان سايكەس ورتالىق اپپاراتتاعى شتات 34 پايىزعا، ياعني 729-دان 480-گە دەيىن قىسقاردى. سونىمەن قاتار ورتالىق اپپاراتتاعى دەپارتامەنتتەردىڭ سانى ءۇش ەسە ازايدى. باسقارۋشى ديرەكتورلار لاۋازىمى جويىلدى. وسىلايشا «قازمۇنايگاز» كومپانياسىنىڭ ورتالىق اپپاراتى نارىقتاعى وزگەرىستەرگە تەز ءارى ءتيىمدى جاۋاپ بەرە الاتىنداي جيناقى بولىپ، قايتا قۇرىلادى»، - دەدى ول.

 

سوڭعى جاڭالىقتار