1 مامىر, 10:22 1074 0 ەكونوميكا انار لەپەسوۆا

"تالاپتار وزگەرمەسە، شىعىنعا باتامىز": وتاندىق اۋە كومپانيالارى بيلەت باعاسىن كوتەرمەك

مامىردىڭ ورتاسىنا قاراي ەلىمىزدە اۋە بيلەتتەرى قىمباتتاۋى ىقتيمال. 

بۇل تۋرالى Air Astana كومپانياسىنىڭ ۆيتسە-پرەزيدەنتى ايتتى. ونىڭ سوزىنشە، ۇشاقتا جولاۋشىلار اراقاشىقتىق ساقتاپ وتىرۋى ءتيىس دەگەن تالاپ اۋە كومپانيالارى ءۇشىن ءتيىمسىز. سەبەبى ۇشاق سىيىمدىلىعىن تولتىرماي، ۇشۋ تاسىمالداۋشى كومپانيانى شىعىنعا باتىرادى.

اۋە كومپانيالارى بۇرىنعى باعانى ونىنشى مامىرعا دەيىن ساقتاۋعا ۋادە بەرىپ وتىر. وعان دەيىن ۇشۋعا قاتىستى سانيتارلىق تالاپتار وزگەرمەسە، باعا بىرتىندەپ كوتەرىلەدى.

ۇشاقتاعى جولاۋشىلاردىڭ اراسىندا بوس ورىن بولۋى ءتيىس دەگەن تالاپ اۋە كومپانيالارىن شىعىنعا باتىرادى. Air Astana كومپانياسىنىڭ ۆيتسە-پرەزيدەنتى ەرداۋلەت شامشيەۆ وسىنداي پىكىردە. ونىڭ ايتۋىنشا، اۆتوبۋس نەمەس جەڭىل كولىكپەن جولاۋشى تاسىمالدايتىندارعا مۇنداي تالاپ قويىلماعان. ياعني ولار بوس ورىننىڭ بارلىعىنا ادام وتىرعىزا الادى. سوندىقتان تەك ۇشاقتارعا قاتىستى قويىلعان بۇل تالاپ قيىسىنعا كەلمەيتىنىن جەتكىزدى.

پىكىردى SCAT اۋە كومپانياسىنىڭ ۆيتسە-پرەزيدەنتى دە قۋاتتايدى. ول توتەنشە جاعداي كەزىندە تاريفتەردىڭ بۇرىنعى قالىپتا ساقتالاتىنىن، بىراق بۇلاي جالعاسا بەرسە، كومپانيالاردىڭ بانكروت بولاتىنىن ايتادى. سوندىقتان 10 مامىردان كەيىن بيلەتتەردىڭ قۇنىن كوتەرۋگە ءماجبۇر. ال ەلىمىزدىڭ ازاماتتىق اۆياتسيا كوميتەتى بيلەتتەردىڭ باعاسى بۇرىنعى كۇيدە قالاتىنىن ايتقان بولاتىن.

سوڭعى جاڭالىقتار