6 ءساۋىر, 15:10 340 0 جاڭالىقتار اسىل تۇمار

نۇر-سۇلتانداعى قوناق ۇيلەر مەديتسينا قىزمەتكەرلەرىنە تەگىن بولمە بەرەدى

سۋرەت عالامتوردان الىندى
سۋرەت عالامتوردان الىندى

قر تۇڭعىش پرەزيدەنتى – ەلباسى نۇرسۇلتان نازارباەۆ COVID-19 قاتەرىنىڭ تارالۋىنا جول بەرمەۋ ءۇشىن بارشا قازاقستاندىقتاردى بىرىگۋگە شاقىردى.

وسى قاۋىپ-قاتەرمەن كۇرەسۋ ماقساتىندا ەلباسى وتاندىق بيزنەس وكىلدەرىن مەملەكەتتىڭ كۇش-جىگەرىن قولداۋعا جانە قارجىلىق كومەك كورسەتۋگە ءوتىنىش ءبىلدىردى. ناتيجەسىندە ەلىمىزدىڭ كوپتەگەن كومپانيالارى مەن كاسىپكەرلەرى اقشا سالىمدارىن جاساي وتىرىپ، وسىناۋ ۇندەۋدى قولدادى. ونىڭ ىشىندە ۇلكەن سوما ەلباسىنىڭ باستاماسىمەن قۇرىلعان «Birgemiz» قوعامدىق قورىنا جىبەرىلدى، قوردىڭ قىزمەتى ەپيدەميا جاعدايىندا حالىقتىڭ الەۋمەتتىك وسال توپتارىنا كومەك كورسەتۋگە باعىتتالعان.

كۇن سايىن مىڭداعان مەديتسينا قىزمەتكەرلەرى قازاقستاندىقتاردىڭ ءومىرى ءۇشىن كۇرەسىپ، ولاردىڭ تەز ارادا ساۋىعۋىنا قامقورلىق جاساۋدا.

مەديتسينا قىزمەتكەرلەرى ءوز وتباسىلارى مەن ۇيلەرىن كورمەي قاۋىپ-قاتەر ايماعىندا تۇرىپ جاتىر. وسى ورايدا ەلوردالىق «دۋمان» جانە «ديپلومات» قوناق ۇيلەرى مەديتسينالىق قىزمەتكەرلەردى قولداۋ ءۇشىن ءوز قوناق ۇيلەرىنىڭ 300 بولمەسىن ۇسىنىپ، ولاردى تاماقتاندىرۋ ۇيعارىپ وتىر.

«دۋمان»  قوناق ءۇي كەشەنىنىڭ باسقارۋشى ديرەكتورى ءاليا دۇيسەكەەۆا: «ءبىزدىڭ قوناق ءۇي وتكەن اپتادان باستاپ دارىگەرلەرگە ءوز ەسىگىن اشتى. ءبىز پەرسونالىمىزدىڭ قالاي قابىلدايتىنىن ۋايىمداعان بولاتىنبىز، الايدا ادامدار بۇكىل الەمدە قالىپتاسقان وسى جاعدايعا كومەكتەسۋگە وتە قۋانىشتى بولدى. ادام ءومىرىن قاتەرلى ىندەتتەن اراشالاۋعا جانىن سالىپ جاتقان اق حالاتتى ابزال جانداردى ءوز قوناق ۇيىمىزدە قابىلداۋعا قۋانىشتىمىز!» – دەيدى.

قالانىڭ ورتالىعىندا ورنالاسقان بۇل قوناق ۇيلەر مەديتسينالىق قىزمەتكەرلەرگە اۋىسىم اراسىندا شاعىن دەمالىسقا جانە جۇمىسقا تەز ارادا جەتۋگە مۇمكىندىك بەرەدى.

«ديپلومات» وتەلى» ارقاشاندا سىزدەردى قابىلداۋعا دايىن. دارىگەرلەردى جاتىن بولمەلەرگە ورنالاستىرىپ، ولاردى تاماقتاندىرۋدامىز. ولار مۇندا ءوز ۇيىندەگىدەي جايلى ءومىر ءسۇرۋى ءۇشىن بارلىعىن جاسايمىز. ءبىز وسى قيىن كەزەڭدى بىرگە جانە بىرىگىپ قانا جەڭەمىز» – دەدى «ديپلومات» قوناق ءۇي كەشەنىنىڭ باس ديرەكتورى اباي بەكسەيىتوۆ.

ەلىمىز ءۇشىن كۇردەلى كەزەڭدى، قازىرگى تاڭداعى قيىندىقتاردى ەڭسەرۋگە جۇمىلا اتقارعان يگى ىستەر مەن كۇش-جىگەر كومەكتەسەدى. بۇل اكسيومانىڭ دۇرىستىعىن تاريحتا بولعان ۋاقيعالار كورسەتىپ وتىر.

سوڭعى جاڭالىقتار