3 ءساۋىر, 11:40 1162 0 قاۋىپسىزدىك انار لەپەسوۆا

مينيستر اسكەري مىندەتتىلەردى ارناۋلى جيىندارعا شاقىرۋ ءتارتىبىن ءتۇسىندىردى

قر قورعانىس ءمينيسترى نۇرلان ەرمەكباەۆ اكىمدەرگە اسكەري مىندەتتىلەردى ارناۋلى جيىندارعا شاقىرۋ قالاي جۇزەگە اسىرىلاتىنىن ءتۇسىندىردى. 

«بۇل جارلىقتىڭ نەگىزگى مازمۇنى – اكىمدەرگە اسكەري مىندەتتىلەردى ارنايى جيىندارعا شاقىرۋعا قۇقىق جانە مۇمكىندىك بەرۋ. باستى ماقسات – حالقىمىزدىڭ قاۋىپسىزدىگى مەن دەنساۋلىعىن قورعاۋ. اتالعان جارلىق اكىمدەردى اۋماقتىق اسكەردى تولىعىمەن جيناۋدى مىندەتتەمەيدى. جيىن زاڭعا سايكەس ءۇش ايعا دەيىن سوزىلۋى مۇمكىن. ايتسە دە جيىننىڭ مەرزىمىن ءوز قاجەتتىلىگىنە قاراي جەرگىلىكتى اتقارۋشى ورگان بەلگىلەيدى. ولار ءوز قاۋلىسىمەن جيىنداردى ۇيىمداستىرىپ، وڭىردەگى قاجەتتىلىك پەن بارلىق شارانىڭ ورىندالۋىنا قاراي ەرتەرەك اياقتاۋىنا مۇمكىندىك بولادى»، - دەدى نۇرلان ەرمەكباەۆ.

ۆەدومستۆو باسشىسىنىڭ ايتۋىنشا، جەكەلەگەن ايماقتاردىڭ اكىمدەرى 10 كۇندىك، كەيبىرى ودان دا ۇزاق اسكەري جيىندى ۇيىمداستىرا الادى. نۇرلان ەرمەكباەۆ، سونىمەن قاتار، مۇنداي جيىن زاڭ بويىنشا 3 ايعا سوزىلۋى مۇمكىن ەكەنىن ايتىپ ءوتتى.

«كەيبىر ايماقتا اسكەري مىندەتى بار ازاماتتاردى شاقىرۋدىڭ مۇلدە قاجەتتىگى بولمايدى. اسكەري ءبولىم ورنالاسقان ايماقتاردا اسكەري قىزمەتشىلەردىڭ ءبىرشاما بولىگى قازىردىڭ وزىندە جۇمىسقا تارتىلىپ، بەكىتىلگەن شارالار بويىنشا جۇمىستاردى اتقارۋدا. اسكەري قىزمەتشىلەردىڭ ءبىر بولىگى باسقا ايماقتارعا جونەلتىلگەن. ءبارى دە ەلدىڭ جوعارعى اسكەري باسشىلىعى مەملەكەتتىڭ قورعانىسقا قابىلەتتىگىن دە، قارۋلى كۇشتەردىڭ جاۋىنگەرلىك دايىندىعىن دا ەسەپكە الىپ وتىرعانىن ءتۇسىنۋ كەرەك»، - دەدى ول.

ەسكە سالا كەتەيىك، مەملەكەت باسشىسى اسكەري مىندەتتىلەردى ارناۋلى جيىنعا شاقىرۋ تۋرالى جارلىق شىعاردى. 

 

سوڭعى جاڭالىقتار