26 ناۋرىز 2020, 12:30 653 0 دەنساۋلىق انار لەپەسوۆا

قازاقستاندىقتار كوروناۆيرۋستى انىقتايتىن تەستىلەۋدەن اقىلى تۇردە وتە الادى

قازاقستاندىقتار كوروناۆيرۋستى انىقتاۋ تەستىن اقىلى تاپسىرا الادى. بۇل تۋرالى قر دسم تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتىنىڭ توراعاسى ليۋدميلا بيۋرابەكوۆا مينيسترلىكتىڭ Facebook-تەگى پاراقشاسىندا مالىمدەدى. 

«جالپى، بىزدە ەلىمىزگە مۇنداي ەكسپرەسس-تەستتەردى جەتكىزەتىن بىرنەشە دەمەۋشى بار. قازىرگى ۋاقىتتا بىرنەشە كومپانياعا ءبىر رەت اكەلۋگە رۇقسات بەرىپ تە قويدىق. ءبىرىنشى توپتاماسى وسى اپتادا جەتكىزىلەدى. ەكسپرەسس-تەستىلەۋ «وليمپ» زەرتحاناسىنىڭ بازاسىندا جۇرگىزىلەدى. بۇل جەدەل-تەستتەر يممۋنوفەرمەنتتى ساراپتاما ادىسىنە نەگىزدەلگەن. پاتسيەنتتىڭ قانىندا انتيدەنەنى انىقتايتىن بولادى. ياعني، اۋىرىپ جۇرگەندەردى نەمەسە جەڭىل تۇرىمەن اۋىرىپ، جازىلعانداردى انىقتايدى»، - دەدى كوميتەت توراعاسى. 

ونىڭ اتاپ وتۋىنشە، قر دسم كوروناۆيرۋستى انىقتاۋ ءۇشىن تەستىلەۋدەن الەۋمەتتىك ءالسىز توپقا كىرەتىن پاتسيەنتتەردى وتكىزەدى. ولارعا ەڭ الدىمەن دارىگەرلەردىڭ ەسەبىندە تۇرعان تىنىس الۋ ورگاندارىندا سوزىلمالى اۋرۋلارى بار ادامدار، ۆيرۋس جۇقتىرۋ تاۋەكەلى توبىنا كىرەتىن ادامدار، قارتتار جانە 18 جاسقا دەيىنگى بالالار كىرەدى. دەگەنمەن، بۇل ساناتتاعى ادامداردىڭ ناقتى قايسىسى تەستتەن وتەتىندىگى قازىرگى ۋاقىتتا ناقتىلانىپ جاتىر.

«وليمپ» جەكەمەنشىك زەرتحاناسى مۇنداي تەستىلەۋدى اقىلى تۇردە دە وتكىزەتىنى بەلگىلى بولدى. «ال ءبىز تەستتى پوليمەرازدى تىزبەكتى رەاكتسيا-دياگنوستيكاسى ادىسىمەن ناقتى اۋرۋ جۇقتىرۋى مۇمكىن ناۋقاستارعا تەگىن جۇرگىزەمىز»، - دەدى ل.بيۋرابەكوۆا.

 

سوڭعى جاڭالىقتار