25 ناۋرىز, 13:04 391 0 جاڭالىقتار اسىل تۇمار

سقو-دا كوروناۆيرۋس جۇقتىرعان ازامات ومبىدان پويىزبەن كەلگەن

سۋرەت عالامتوردان الىندى
سۋرەت عالامتوردان الىندى

«حابار 24» تەلەارناسىنىڭ تىكەلەي ەفيرىنەن سولتۇستىك قازاقستان وبلىسى دەنساۋلىق ساقتاۋ باسقارماسىنىڭ باسشىسى تيمۋر سۇلتانعازيەۆ وسى وڭىردە كوروناۆيرۋس انىقتالعان پاتسيەنت رەسەيدىڭ ومبى قالاسىنان پويىزبەن كەلگەنىن ايتتى.

«سولتۇستىك قازاقستان وبلىسىندا كوروناۆيرۋس ينفەكتسياسىنىڭ ءبىر جاعدايى ناقتىلاندى. پاتسيەنت 1993 جىلى دۇنيەگە كەلگەن پەتروپاۆل قالاسىنىڭ تۇرعىنى. رەسەيدىڭ ومبى قالاسىنان كەلگەن. سول قالادا ءبىلىم الىپ جۇرگەن. 23 ناۋرىز كۇنى كەشكىسىن ترانزيتتىك پويىزبەن كەلگەن. تىعىز قارىم-قاتىناستا بولعان تۇلعالاردىڭ بارلىعى انىقتالىپ، كارانتينگە الىندى. پاتسيەنت ۆوكزالدان ۇيىنە بارعان، كوشەگە شىقپاعان جانە تەك اناسىمەن عانا تىعىز بايلانىستا بولعان. كەلەسى كۇنى، 24 ناۋرىزدا دەنە قىزۋىنىڭ 37,6 گرادۋسقا كوتەرىلۋىنە شاعىمدانىپ، جەدەل جاردەم كومەگىنە جۇگىنگەن. جەدەل جاردەم بريگاداسى رەسەيدەگى ەپيدەميولوگيالىق جاعدايدى ەسكەرە وتىرىپ، پاتسيەنتتى تولىقتاي قورعانىس زاتتارىمەن وقشاۋلاپ، پروۆيزورلىق ستاتسيونارعا جەتكىزدى»، – دەدى ول.

باسقارما باسشىسىنىڭ ايتۋىنشا، پاتسيەنتتەن الىنعان سىناما ونىڭ كوروناۆيرۋس جۇقتىرعانىن انىقتاپ وتىر. قوسىمشا ساراپتاما جاساۋ ءۇشىن ناۋقاس سىناماسى الماتىداعى زەرتحاناعا دا جىبەرىلدى.

«بۇگىنگى كۇنى پاتسيەنتتىڭ جاعدايى بىرقالىپتى. دەنە قىزۋى، شاعىمى جوق. ونىمەن بايلانىستا بولعاندار، ونىڭ ىشىندە پويىزداعى جولاۋشىلاردىڭ بارلىعى كارانتيندىك ستاتسيونارعا وقشاۋلاندى. زەرتحانالىق سىناما الىندى. بارلىعىنىڭ جاعدايى قاناعاتتانارلىق»، – دەدى تيمۋر سۇلتانعازيەۆ.

 

سوڭعى جاڭالىقتار