25 ناۋرىز, 09:08 433 0 جاڭالىقتار اسىل تۇمار

پرەزيدەنت قحر توراعاسى سي تسزينپينمەن تەلەفون ارقىلى سويلەستى

سۋرەت - inform.kz
سۋرەت - inform.kz

قازاقستان پرەزيدەنتى قحر توراعاسى سي تسزينپينمەن تەلەفون ارقىلى سويلەستى، – دەپ حابارلادى اقوردانىڭ ءباسپاسوز قىزمەتى.

قازاقستان پرەزيدەنتى كوروناۆيرۋس پاندەمياسىنىڭ تارالۋىن اۋىزدىقتاۋ جونىندەگى قىتاي باسشىلىعىنىڭ باتىل ءارى جۇيەلى ءىس-قيمىلدارىن جوعارى باعالادى.

«بۇكىل الەم قىتاي مەديتسيناسىنىڭ زور الەۋەتى مەن دارىگەرلەرىنىڭ جوعارى كاسىبيلىگىنە ءتانتى بولدى. جالپى، قىتاي ءسىزدىڭ باسشىلىعىڭىزبەن ورتالىقتاندىرىلعان باسقارۋشىلىق جۇيەنىڭ زور الەۋەتىن جانە داعدارىس جاعدايىن ءتيىمدى شەشۋگە قابىلەتتى ەكەنىن كورسەتتى»، – دەدى پرەزيدەنت.

قاسىم-جومارت توقاەۆ ءارى قازاقستاننىڭ ستراتەگيالىق سەرىكتەستىك باعىتىن ودان ءارى نىعايتا بەرۋگە نيەتتى ەكەنىن جەتكىزدى.

ونىڭ پىكىرىنشە، وسى ورايدا بىلتىر قىركۇيەكتە بەيجىڭدە قول قويىلعان قازاقستان مەن قىتاي اراسىنداعى ۇزاق مەرزىمدى جانە جان-جاقتى ستراتەگيالىق سەرىكتەستىك تۋرالى دەكلاراتسيانىڭ ءمانى زور.

«كورشىلەس ەلدەرىمىزبەن اراداعى وسىنداي ىنتىماقتاستىق قازاقستان مەن قىتاي حالىقتارىنىڭ ەجەلگى مۇددەلەرىنە سايكەس كەلەدى دەپ سەنەمىن. ءبىز ەكونوميكالىق جانە گۋمانيتارلىق سالالاردا ءوزارا ءتيىمدى ءارى پايدالى جوبالار جاساۋعا كۇش سالۋىمىز قاجەت، – دەپ سانايدى قاسىم-جومارت توقاەۆ.

پرەزيدەنت ەكى ەلدىڭ بۇۇ-داعى، شانحاي ىنتىماقتاستىق ۇيىمىنداعى، ازياداعى ءوزارا ىقپالداستىق جانە سەنىم شارالارى جونىندەگى كەڭەستەگى تابىستى ىنتىماقتاستىعىن وڭ باعالاپ، سونداي-اق، «ءبىر بەلدەۋ – ءبىر جول» مەگا جوباسىنىڭ اياسىندا ۇلى جىبەك جولى تۇجىرىمداماسىن ودان ءارى ىسكە اسىرۋ بارىسىنداعى ءىس-قيمىلداردىڭ ماڭىزى زور ەكەنىن اتاپ ءوتتى.

سي تسزينپين كوروناۆيرۋستىڭ تارالۋى بارلىق ەل ءۇشىن كۇتپەگەن سىناق بولعانىن ايتتى. قىتاي پاندەمياعا قارسى الەمدىك كۇرەسكە ۇلكەن ۇلەس قوستى. قىتاي باسشىسى بۇل ىستە ءالى تولىق جەڭىسكە جەتتىك دەپ سانامايدى. ىندەتتىڭ ەكىنشى مارتە قايتالانباۋى ءۇشىن قوسىمشا شەشىمدەر قابىلداۋ قاجەت.

قحر توراعاسى سي تسزينپين قازاقستان مەن ونىڭ باسشىلىعىنا قىتايعا كوروناۆيرۋسكە قارسى كۇرەستە كورسەتكەن ناقتى قولداۋى ءۇشىن ريزاشىلىق ءبىلدىرىپ: «سىزدەر «دوس قيىن ساتتە سىنالادى» دەگەن ماقالدىڭ دۇرىس ەكەنىن انىق كورسەتتىڭىزدەر. قىتاي ءوز تاراپىنان قازاقستاندى مەديتسينالىق جابدىقتارمەن قامتاماسىز ەتىپ، گۋمانيتارلىق كومەك كورسەتۋگە دايىن»، – دەدى.

قىتاي مەملەكەتىنىڭ باسشىسى قازاقستان پرەزيدەنتىنىڭ توتەنشە جاعداي كەزىندەگى كوشباسشىلىق قاسيەتىن جوعارى باعالاپ، ونىڭ باتىل ءارى دەر كەزىندە قابىلدانعان شارالارىنا توقتالدى. سي ءتسزينپيننىڭ ايتۋىنشا، پاندەميادا مەملەكەتتىك شەكارا دەگەن بولمايدى، بۇكىل الەمگە وتە جىلدام قارقىنمەن تارالۋدا. سوندىقتان «ادامزاتتىڭ تاريحي تاعدىرى ءبىر» تۇجىرىمىنىڭ وزەكتىلىگى ارتىپ كەلەدى. اتالعان تۇجىرىمعا سايكەس بارلىق مەملەكەت كۇللى حالىقارالىق قوعامداستىقتى وركەندەتۋ جولىندا كۇش-جىگەرىن بىرىكتىرۋى ءتيىس.

«ىندەت كەلەدى، كەتەدى. ال دوستىق پەن ىنتىماقتاستىق – ماڭگىلىك قۇندىلىقتار»، – دەدى قحر توراعاسى.

ونىڭ پىكىرىنشە، قىتاي مەن قازاقستان بارلىق سالادارداعى، اسىرەسە قارجى، يندۋستريالىق جانە تسيفرلىق تەحنولوگيالار سياقتى ماڭىزدى باعىتتارداعى ىنتىماقتاستىقتى ارتتىرا الادى.

اڭگىمە سوڭىندا سي تسزينپين ەلباسى نۇرسۇلتان نازارباەۆقا جۇرەك جاردى سالەمىن جولدادى.

سوڭعى جاڭالىقتار