23 ناۋرىز 2020, 15:09 1017 0 ساياسات انار لەپەسوۆا

"ەسكى ادىسپەن جۇمىس ىستەيتىندەر قىزمەتىنەن بوساتىلادى": پرەزيدەنت اكىمدەر مەن مينيسترلەرگە ەسكەرتۋ جاسادى

توتەنشە جاعداي كەزىندە قىزمەتىنە سالعىرت قاراعان مينيستر مەن اكىمدەر قىزمەتتەرىنەن بوساتىلادى. بۇل تۋرالى اقوردادا توتەنشە جاعداي جونىندەگى مەملەكەتتىك كوميسسيانىڭ وتىرىسىن وتكىزگەن قر پرەزيدەنتى قاسىم-جومارت توقاەۆ ايتتى. 

"بۇكىل مەملەكەتتىك اپپارات تەز قالپىنا كەلتىرىلىپ، بۇرىنعى جايباراقات جۇمىس شەڭبەرىنەن شىعۋى ءتيىس. وسىنداي قيىن جاعدايدا باسقارۋ تۇبەگەيلى وزگەرتىلۋى كەرەك. جاۋاپكەرشىلىكتى سەزىنىپ، باتىل، ءتيىمدى شەشىمدەر قابىلداۋ قاجەت. مەن ءوز تاراپىمنان مەملەكەتتىك باسقارۋ جۇيەسىنە داعدارىستىڭ سالدارىمەن كۇرەسۋ ءۇشىن جەدەل شەشىمدەر قابىلداۋ قۇقىعىن بەرەتىن بىرقاتار داعدارىسقا قارسى جارلىقتارعا قول قويدىم", - دەيدى قاسىم-جومارت توقاەۆ.

ونىڭ ايتۋىنشا، وسىلايشا مەملەكەتتىك ورگاندار كەز-كەلگەن تۋىنداعان ماسەلەلەردى شەشۋگە بارلىق مۇمكىندىككە يە.

"ياعني، بيۋدجەت پروتسەسىندە، باعانى رەتتەۋدە، مەملەكەتتىك ساتىپ الۋلاردا، جەڭىلدىكتەر بەرۋدە جانە ت.ب شارالاردى قابىلداۋ كەزىندە باتىل شەشىم قابىلداۋلارىنا قۇقىقتارى بار. مەنىڭ ۇكىمەتتىڭ ءار مۇشەسىنە، اكىمدەرگە ايتارىم - باسقاشا تارتىپتە جۇمىس ىستەيتىن ۋاقىت كەلدى. قازىرگى قيىن ءساتتى تۇسىنبەيتىندەر جانە "ەشتەڭە ءبۇلدىرىپ المايىن" دەپ جەكە باستارىنىڭ قامدارىن ويلاپ، ەسكى ادىسپەن ارەكەت ەتۋگە تىرىساتىندار قىزمەتتەرىنەن بوساتىلادى", - دەدى پرەزيدەنت.

 

سوڭعى جاڭالىقتار