26 Aqpan, 18:30 346 0 Jahan Túrkistan Gazeti

Hanaý mıgranttaryn qanaýǵa jol bergen kim?

Germanııadaǵy Hanaý qalasynyń turǵyny Tobıas Raten esimdi 47 jasar nemis azamaty ulttyq jáne dinı alaýyzdyq, jekkórýshilik negizinde beıbit adamdarǵa oq jaýdyrǵan.

Hanaý qalasynyń ortalyǵynda ornalasqan eki kalıan barǵa kezekpen-kezek basa kóktep kirgen Tobıas Raten toǵyz adamdy atyp óltirip, alty adamdy jaralaǵan. Bul qylmysynan keıin úıine qaıtyp oralǵan ol 72 jastaǵy óz anasyn óltirip, artynsha óz-ózine qol jumsap, qaıtys bolǵan. Belgili bolǵandaı, radıkaldy kózqarasty ustanǵan Tobıas qylmys jasar aldynda jeke veb-saıtyna 24 bettik manıfest jarııalap, jelige arnaıy vıdeoúndeý júktegen. Bul materıaldarǵa sáıkes, ol ǵalamdy etnıkalyq tazalaýdyń josparyn quryp, sonyń ishinde Taıaý Shyǵys elderindegi, sondaı-aq, Azııadaǵy birqatar aımaqtardy, Soltústik Afrıka, Ortalyq jáne Ońtústik Amerıkany mekendeıtin turǵyndar men «aralas» nemisterdi joıýǵa nıetti ekenin bildirgen. Germanııanyń bas prokýrory Peter Franktyń aıtýynsha, qaza tapqan toǵyzdyń túgeli derlik mıgranttar, sonyń ishinde bes túrik azamaty, olardyń arasynda etnıkalyq kúrd azamattary da bolǵan. Túrkııa Prezıdenti Redjep Erdoǵan Germanııa memleketin ıslamofobııaǵa qarsy kúreste aıtarlyqtaı kúsh salmaı jatqandyǵyn synǵa alyp, bul qylmysty túrik halqyna qarsy jasalǵan násilshildik shabýyl dep baǵalady. Oqıǵa ornyna arnaıy kelip, gúl shoqtaryn qoıǵan Germanııa Prezıdenti Frank-Valter Shtaınmaıer nemister men ózge ult ókilderi násilshildikti jeńý jolynda birigý kerek ekenin jetkizdi.

Álııa TILEÝJANQYZY

Sońǵy jańalyqtar