21 Aqpan, 12:09 2049 0 Jańalyqtar Asyl TUMAR

«Zańsyzdyq ákimdik tarapynan bolyp otyr». Bek Air men ushaq qulaǵan úı ıesiniń soty 20 naýryzǵa shegerildi

Sýret - azattyq-ruhy.kz
Sýret - azattyq-ruhy.kz

Almaty oblysy Talǵar aýdandyq soty Bek Air áýe kompanııasynyń talap aryzyn qaraýdy keıinge shegerdi. Búgin áýe kompanııasyna tıesili ushaq soǵylǵan ǵımarat qurylysyn zańsyz dep taný jónindegi shaǵymy qarsy taraptyń sotqa daıyndyqsyz kelýine baılanysty 20 naýryzǵa belgilendi.

azattyq-ruhy.kz saıtynyń jazýynsha, Gúldala aýyldyq okrýgindegi ushaq qulaǵan úı ıesi Reshet Qalıbek qarjylyq qıyndyqtarǵa baılanysty advokat jaldaýǵa múmkindigi bolmaǵanyn aıtty. Sondaı-aq sot qazysy jaýapkerdiń orys tilin bilmegendikten aýdarmashy qamtamasyz etilmegenin eskerip, sottyń aldyn ala tyńdaýyn bir aıǵa shegerýge májbúr ekenin jetkizdi. Óz kezeginde úı ıesi Reshet Qalıbek áýe kompanııasyna qarsy talap aryz daıyndaıtynyn málimdedi.

«Men Bek Air kompanııasynyń talabyn túsingen joqpyn. Meni ne úshin sotqa berip jatyr? Bul jerde zańsyzdyq jergilikti ákimdik tarapynan bolyp otyr. Men óz tarapymnan zańgerlermen aqyldasyp, áýe mekemesiniń ózin sotqa beremin. Búgingi sotqa advokat jaldap úlgermedim. Aqsham bolmady. Sóılesken qorǵaýshylar qymbat surady», – deıdi R. Qalıbek.

Al Bek Air áýe kompanııasynyń prezıdenti Nurlan Jumasultanov apatqa ushyraǵan ushaq oqıǵasyna osy zańsyz salynǵan úı sebepker bolǵanyna senimdi, jáne jaýapkerdiń úıiniń zańsyz salynǵanyn sot arqyly dáleldeıtinin aıtty.

Esterińizge sala keteıik, 2019 jylǵy 27 jeltoqsanda Bek Air ushaǵy apatqa ushyrady. Almatydan Nur-Sultanǵa ushyp shyqqan laıner ushý kezinde ornynan kóterile almaı, áýejaı qorshaýyn buzyp ótip, úıge soǵylǵan bolatyn. Ushaq bortynda 93 jolaýshy jáne 5 ekıpaj múshesi bolǵan. Apattan 12 adam qaza tapty.

Bek Air kompanııasy ushaq soǵylǵan úıdiń ıesin sotqa bergeni jáne 21 aqpanda soty bolatyny jaıly aqpar tarady. Soǵylǵan úıdiń ıesi Reshet Qalıbek Qytaı elinen kóship kelgen qandasymyz bolyp shyqty.

Osyǵan oraı, Túrkistan gazetiniń qandastarǵa arnalǵan ATAJURT jobasy bul iske beıjaı qaraı almaıdy. Sondyqtan birinshi úı ıesi Reshet Qalıbekpen habarlasyp, mán-jaıdy surap kórdi.

Onyń aıtýyna qaraǵanda, úı salýǵa arnalǵan jerdiń «gosaktisi» qolynda bar. Jerdi Gúlnár Ómirǵazıeva degen azamatshadan satyp alǵan.

Túrkistan gazeti Bek Air kompanııasynyń qandasymyz Reshet Qalıbekti sotqa berýine qatysty belgili mamandardyń pikirin bilgen edi, oqı otyryńyz.

Ushaq apatyna qatysty is áli aıaqtalǵan joq. Qoǵam da bul iske alańdaýly. Kimniń kináli ekeni de anyq­talmaı keledi.

Sońǵy jańalyqtar