18 Aqpan, 17:53 411 0 Jańalyqtar Asyl TUMAR

Almatyda súıektiń qaterli isigine shaldyqqan 45 balaǵa kúrdeli ota jasaldy

Respýblıkalyq pedıatrııa jáne balalar hırýrgııasy ǵylymı ortalyǵynda balalardaǵy osteosarkomalar kezinde iri býyndardy endoprotezdeý boıynsha biregeı operaııalar jasalýda, dep habarlady Pedıatrııa ortalyǵynyń baspasóz qyzmeti. 

Osteosarkoma – súıektiń sırek kezdesetin qaterli isigi. Bul dert 10 jastan asqan balalarda jıi kezdesedi. Elimizde jyl saıyn osteosarkoma aýrýyna shamamen 15 jasóspirim shaldyǵady. Barlyq osteosarkomanyń 50 paıyzdan astamy tize býynyna jaqyn ornalasqan.

Sońǵy jyldary súıek isikteri kezinde joǵary mólsherli hımıoterapııany engizýdiń arqasynda metastazanyń tómendeýi baıqalady. Bul kóptegen jaǵdaılarda (90%-dan astam) zaqymdanǵan aıaqty saqtaýǵa múmkindik berdi. Iaǵnı, joǵaryda atalǵan patologııasy bar balalardyń aıaq-qolyn kespeıdi.

«Pedıatrııa jáne balalar hırýrgııasy ǵylymı ortalyǵynda balalar men jasóspirimderdiń súıek sarkomasy kezinde endoprotezderdi qoldaný arqyly aıaq-qoldy saqtap qalý boıynsha ota jasaý 2012 jyldan beri júrgiziledi. Ortalyqtyń zamanaýı modýldik endoprotezderdi satyp alý múmkindiginiń jáne qarqyndy joǵary mólsherli hımıoterapııany qoldanýdyń arqasynda organsaqtaýshy ádispen ota jasaýdyń múmkindigi artty. Sondaı-aq balalardaǵy osteosarkomany biriktirip emdeý nátıjeleri de jaqsardy. Aıta ketsek, onkologııalyq endoprotezder ortopedııalyq protezderge uqsas emes, erekshe megaprotezder bolyp tabylady. Qazirgi tańda hırýrgııalyq emdeýdiń osy túri osteosarkomaǵa shaldyqqan balalardyń 90%-dan astamyna jasalady, ol óz kezeginde balanyń áleýmettik beıimdelýi men onyń ómir súrý sapasynyń jaqsarýyna múmkindik týǵyzyp otyr» - deıdi onkohırýrg Bahram Jumadillaev.

Aıaq-qoldy saqtaı otyryp em aıaqtalǵannan keıin jalpy saýyǵyp ketý jaǵdaılary elimizde 70 paıyz. Bul nátıje osteosarkomany zertteý jónindegi halyqaralyq mýltıortalyqtar nátıjesiniń derekterimen sáıkes keledi.

Sońǵy 5 jyl ishinde Pedıatrııa jáne balalar hırýrgııasy ǵylymı ortalyǵynda iri býyndardy endoprotezdeı otyryp (tize, ıyq, jambas) osteosarkoma kezinde dene múshesin saqtap qalý boıynsha 45 ota sátti jasaldy. Sondaı-aq balalardyń aıaq-qoldarymen qosa, olardyń ómir súrý sapasy da jaqsardy.

Sońǵy jańalyqtar