18 Aqpan, 09:02 300 0 Jańalyqtar Asyl TUMAR

Kóktemgi sý tasqynyna daıyndyq kúsheıdi

Sýret ǵalamtordan alyndy
Sýret ǵalamtordan alyndy

Almaty oblysynyń kúshtik qurylymdary kóktemgi sý tasqynyna daıyndyqty kúsheıtýde. Azamattyq qorǵanys salasy boıynsha 3,5 myńnan astam adam arnaıy toptarǵa jumyldyrylyp, barlyq quraldarmen qamtamasyz etilgen.

Búgingi tańda oblys aýmaǵynda 76 sý qoımasy, 117 toǵan, 21 bóget, 35 sý toraby, 158 magıstraldy kanal bar. Bul qurylystarda turaqty monıtorıng júrgizilip, sý tasqyny jaǵdaıyn baqylaý úshin 96 gıdrobeket qoıylǵan. Qazirgi tańda aryqtar men kanaldardyń, sýaǵar qubyrlardyń arnalary tazartylyp, halyqty aqparattandyrý jumystary jalǵasýda.

«Tótenshe jaǵdaı oryn alǵan jaǵdaıda shuǵyl shyǵyndar saldaryn joıýǵa oblys bıýdjetinen 1,2 mlrd teńge qarjy qarastyrylyp otyr», – deıdi oblystyq TJD basshysynyń orynbasary Erlan Ahashov.

Sondaı-aq, birinshi kezekte qajetti zattar qory daıyndalǵan. Atap aıtqanda 265 shatyr, 1200 tósek, 8,4 myń dana tósek jabdyqtary saqadaı saı tur. Shuǵyl evakýaııalaýǵa 50 qabyldaý orny belgilenip, 122 dana sý soratyn motopompa qarastyrylǵan.

Sońǵy jańalyqtar