12 Jeltoqsan, 17:27 540 0 Jańalyqtar Asyl TUMAR

Sheneýikterdiń súıikti syılyǵy qandaı?

Sybaılas jemqorlyqqa qarsy is-qımyl agenttigi memlekettik qyzmetkerler arasynda eń kóp taralǵan syılyqtardyń tizimin usyndy.

Bul tizimge túrli kosmetıkalyq kompanııalardyń ónimderi, tort, táttiler, qymbat alkogol ishimdikteri, ishine tartylǵan et salynǵan záıtún, kornıshon jáne taǵy basqa qymbat dúnıeler kirgen. Bıyl mýzykalyq quraldar, ásirese, dombyra syılaý «suranysta» bolypty. Kóz tııýden qorǵaıtyn buıymdar, sharf, Adidas sporttyq kostıými, erlerge arnalǵan Tissot saǵaty, tipti, úı kıimderi de (pıjama) tartý etilgen. Al qarapaıym halyq memlekettik qyzmetkerlerge degen yqylasyn kóbine-kóp 2-3 myń teńge kóleminde nemese uıaly telefonyna birlik esebinde bildiredi eken.

Sybaılas jemqorlyqqa qarsy is-qımyl agenttiginiń bas mamany Symbat Israpýlovanyń málimetinshe, bıyl ákimshilik quqyqbuzýshylyq boıynsha 27 hattama toltyrylyp, 10 mıllıon 386 myń 200 teńge kóleminde aıyppul salynǵan. Agenttik ókili eger turǵyndar óz erkimen syılyq berýdi maqul kórse, eki tarapqa da (syılyq berýshige de, alýshyǵa da) eshqandaı shara qoldanylmaıtynyn eskertti. Dese de, «Memlekettik qyzmetkerlerdi aty-jóni joq «marapattaı» berýdiń sońy nendeı nársege ákeletinin oılanǵanymyz abzal, 2 myń teńge alyp, aqysyn 200 ese óteýge týra keletinin de esten shyǵarmaǵan jón», - deıdi Symbat Israpýlova.

Sońǵy jańalyqtar