4 Jeltoqsan, 09:38 707 0 Densaýlyq Anar LEPESOVA

Jótelmen aýrýhanaǵa túsken búldirshin ekpeden soń qolynan aıryldy

Aqmola oblystyq balalar aýrýhanasyna tynys joldarynyń aýrýymen túsken eki jarym jastaǵy ul bala sol qolynan aıryldy. Anasynyń sózinshe, sońǵy salǵan ekpeden keıin balasynyń qoly qaraıyp, jan ketip qalǵan. Aqyry ómirin aman alyp qalý úshin kesýge týra kelipti. Endi baǵasy qymbat protez aldyrýdyń qamyna kirisken ana dárigerlerdi sotqa bermek dep habarlaıdy  KTK arnasy.

Tynys alý joldary aýrýymen aýrýhanaǵa kelip túsken Baýyrjannyń beti qazir beri qarady. Ata-anasy eki jarym jasqa endi tolǵan búldirshinniń basynan ótken jaǵdaıǵa Aqmola oblystyq balalar aýrýhanasyn kináli dep tanyp otyr.

"Ol jerde bala eki apta jansaqtaý bóliminde em aldy. Ókpesine bronhoskopııa jasap, tazalady. Sodan keıin palataǵa aýystyrdy. Palatada sol kúni balanyń sol qolyna katetor arqyly antıbıotık saldy. Sol antıbıotıkten keıin balanyń qoly bes mınýttan keıin jansyzdanyp qalǵan", - deıdi búldirshinniń anasy Aqbópe Qalıla.

Ekpeden keıin balanyń saýsaqtarynyń ushy muzdaı bastaǵan. Ata-ananyń sózinshe, olar o basta kezekshi dárigerge balanyń jaǵdaıyn eskertken.

Alaıda ol kelip, búldirshindi qarap, qolyn ýqalaı berý kerek ekenin ǵana aıtypty. Aqyry sol qoly qara muz bolyp, saýsaq ushy jabysyp, shyntaqqa deıin qaraıyp ketken.

"Sol jerde kezekshi bolǵan dárigerlerge eskerttik, balanyń qolyna qan júrmeı jatyr, balam "qolym aýyrdy" dep jylap jatyr, balanyń qoly muzdaı boldy, muzdap bara jatyr dep. Keldi, kórdi, qarady, "ol solaı bolady, massaj jasaı berińiz, ketedi, qazir bári jaqsarady" dedi", - deıdi sábıdiń anasy.

Jaǵdaıdy baqylaı almaıtyn shamaǵa jetkende eki jasar sábı elordadaǵy balalar aýrýhanasyna jiberildi. Al ol jaqtaǵy dárigerler balany aman alyp qalý úshin qolyn kesip tastaýǵa májbúr boldy. Dese de oblystyq aýrýhana ókilderiniń ıaıtýynsha, jaǵdaıǵa ekpeniń qatysy joq eken.

Aqmola oblystyq kópsalaly balalar aýrýhanasynyń bas dárigeri Elena Ivanovanyń aıtýynsha, mundaı jaǵdaı buryn sońdy bolmaǵan jáne bala burynnan beri syrqattanyp júrgen. Alaıda aýrýy asqynyp ketken.

"Ol bizdiń emsharamyzdan bolǵan jaǵdaı emes. Bala burynnan beri aýyrǵan. Sol uzaq ýaqyttan beri asqynǵan syrqaty. Sebebi, ol kúre tamyrynda boldy", - deıdi Elena Ivanova.

Búldirshin osyǵan deıin de aýyryp, em alyp shyqqan eken. Dárigerler sonyń saldary degenge keltiredi.

Iaǵnı, burynnan kele jatqan syrqatynan balanyń aǵzasy, qan aınalymy buzylǵan desedi.

Sábıdiń ata-anasy dárigerlerdiń sózimen esh kelispeıdi. Olar jaýapty medıına organdarynyń ústinen sotqa shaǵymdanbaq.

Sońǵy jańalyqtar