13 Qarasha, 12:33 327 0 Áleýmet Anar LEPESOVA

Dosaev qazaqstandyqtardyń aqsha aýdarymdaryn tekserýge qatysty pikir bildirdi

Kaspi Bank arqyly aqsha aýdarymdaryn jasaıtyn qazaqstandyqtar salyq tóleýge mindettele me? Bul saýalǵa Májilis kýlýarynda Ulttyq bank tóraǵasy Erbolat Dosaev jaýap berdi. 

«Meniń pikirimshe, qarjy mınıstrligi salyq salýdy kózdep otyrǵan joq, tek osy tólemderden salyq tólenip otyrǵanyn kórgisi keledi. Ulttyq bank pen mınıstrlik birlesip jumys isteýde. Qolma-qol aqysyz tólemder kóleminiń artýy bıýdjet kirisiniń artýymen qatar júrýi tıis degen pikirdemin. Bul qalypty jaǵdaı. Sebebi aqsha kóleńkeden shyǵady nemese kólemi artady. Sondyqtan úkimettiń fıskaldyq maqsaty, jalpy, bizdiń kóleńkeli ekonomıkany tómendetýge baǵyttalǵan jumysymyz qosymsha kirister túrindegi jaǵymdy nátıjelermen qatar júrgenin qalar edik», - deıdi Dosaev.

Sonymen qatar ol qarjy mınıstrliginiń usynysy Kaspi Bank boıynsha jasalatyn tólemderge ǵana qatysty emes ekenin atap ótti.

«Bul másele búkil bank sektoryna qatysty. Tólemderdiń qajetti deńgeıin qamtamasyz etý turǵysynan alǵanda, bank sektory úkimet pen qarjy mınıstrligine seriktes bolatyn shyǵar. Ázirge bul qarjy mınıstrliginiń usynysy ǵana. Ázirge bank qoǵamdastyǵymen de talqylanýda», - deıdi Ulttyq bank tóraǵasy.

Eske sala ketsek, buǵan deıin Qarjy mınıstrligi qazaqstandyqtardyń aqsha aýdarymdary tekserilýi múmkin ekenin eskertken bolatyn. Ondaǵy maqsat - salyq tóleýden jaltaryp júrgenderdi anyqtaý.

Sońǵy jańalyqtar