8 Qarasha, 10:26 307 0 Áleýmet Anar LEPESOVA

Aýyldy kórkeıtý  qaǵaz júzinde qalmasyn...

Premer-mınıstr Asqar Mamınniń tóraǵalyǵymen ótken Úkimet otyrysynda «Aýyl – el besigi» baǵ­darlamasynyń júzege asyrylý barysy talqylandy.

Aýyl turǵyndarynyń ómir súrý sapasy men ál-aýqatyn jaqsartý, aýyldardy turaqty damytýdy maqsat etken jobany júzege asyrý úshin 2019-2021 jyldary bıýdjetten 90 mlrd teńge bólý josparlanǵan. Al 2019 jylǵa 30 mlrd teńge qarastyrylyp otyr.

Úkimet otyrysynda jobanyń iske asyrylýy týraly baıandaǵan Premer-mınıstrdiń orynbasary Roman Sklıar qazirgi ýaqytta 6 443 aýylda 7,7 mln adamnyń turatynyn málimdedi. Bul halyqtyń 42 paıyzyn quraıdy. «Búgingi kúni aýyldyq jerlerde birqatar sheshilmegen máseleler bar. Aýyldyń jartysynan astamynda kóshelerdi jóndeý qajet. Injenerlik jeliler tozýynyń joǵary deńgeıi baıqalady. Kóptegen aýyldarda, bilim berý jáne densaýlyq saqtaý obektileri jóndeýdi qajet etedi. Osyǵan baılanysty aýyldy damytý úshin keshendi tásil qoldanýdy usynamyz», – dedi Roman Sklıar.

Vıe-premerdiń málimetinshe, búginde damý áleýeti bar 3 477 aýyl iriktelip alynǵan. Atal­ǵan aýyldarda 6,6 mln adam (aýyl halqynyń 85 paıyzy) turady. Sondyqtan bul eldimekenderdi damytý aldyńǵy kezektegi másele. Sondaı-aq bıyl shamamen 700 myń turǵyny bar 53 aýylda 452 ınfraqurylymdyq joba iske asyrylýda. Jobalardy júzege asyrý úshin 30 mlrd teńge qarastyrylǵan. Bular – áleýmettik (mektepter, aýrýhanalar, mádenıet jáne sport nysandary) jáne ınjenerlik ınfraqurylymdardy (joldar, sý, elektr, jylýmen qamtamasyz etý) jóndeý jáne qaıta jańartý jónindegi jobalar. «Bul jumystyń bastamasy ǵana. Bastalǵan jumystardy biz 2020 jyly jalǵastyramyz. Eli­mizdiń barlyq óńirlerinde aýyl ınfraqurylymyn keń aýqymdy jańǵyrtý bastalady. Kózdelgen 30 mlrd teńgege 2020  jyly qosymsha 50 mlrd teńge bólinetin bolady», – dep atap ótti Premer-mınıstrdiń orynbasary.

Orynbasarynyń esebin muqııat tyńdaǵan Úkimet basshysy Asqar Mamın taqyrypty qorytyndylaý barysynda birqatar naqty tapsyrma berdi. Eń aldymen, «Aýyl – el besigi» jobasyn qarjylandyrýdy ulǵaıtý týraly usy­nystar engizýdi mindettedi.

 

Sońǵy jańalyqtar