7 Qarasha, 10:14 160 0 Qoǵam Ásel ÁNÝARBEK

Túgel túrkiniń tóri – Túrkistan

Qazaqstannyń Tuńǵysh Prezıdenti – Elbasy Nursultan  Nazarbaev Túrkistan oblysyna jumys sapary barysynda qalanyń rýhanı-mádenı ortalyǵynda ótken konerttik sharaǵa qatysyp, oblys turǵyndarymen kezdesti. Odan bólek Nursultan Ábishuly Túrkistan shaharynyń qurylys barysymen tanysyp, nysandardy aralady.

Túrkistanda Qazaqstannyń Tuńǵysh Prezıdenti Craftsman-2019 halyqaralyq qolónershiler jármeńkesin tamashalady. Respýblıka deńgeıinde alǵash ret uıymdastyrylǵan sharaǵa elimizben qatar alys-jaqyn shetelden qolónershiler qatysty. Budan basqa, Elbasy Nursultan Nazarbaev Túrkistan qalasynda jańadan boı kótergen Neke saraıyna baryp, jastarmen beıresmı kezdesý ótkizdi. Aıta keteıik, mundaı arnaıy ǵımarat Túrkistanda buǵan deıin bolmaǵan. Eki qabatty, 2 myń sharshy metrlik saraı – Qostanaı oblysynyń Túrkistanǵa tartýy. Sondaı-aq Elbasy shahardaǵy Halyqqa qyzmet kórsetý ortalyǵyna bas suǵyp, ortalyqtyń jumys barysymen tanysty. Nursultan Nazarbaev Túrkistandaǵy medıa ortalyqtyń ǵımaratyna da bardy. Ortalyq elimizdiń bas qalasynda ornalasqan «Qazmedıa» ǵımaratynan shaǵyndaý bolǵanymen, múmkindikteri boıynsha kem soqpaıdy dese bolady. Odan keıin Elbasy qaladaǵy mýzyka mektebine baryp, óner men mádenıet salasyn damytý úshin qabyldanyp jatqan sharalarmen tanysty. Al oblys ákimdiginiń jańa ǵımaratyna bas suqqan Nursultan Nazarbaev Túrkistan qalasynyń rýhanı-mádenı ortalyǵyn qaıta qurý jumystary boıynsha aralyq nátıjelerden habardar boldy.

Elbasy shaharda júrip jatqan qurylys qarqynynyń joǵary ekenine toqtaldy. «Birinshi kezeńde 175 nysannyń qurylysy josparlanǵan. Onyń 102-i bıyl iske qosylady. Bul proeske elimizdiń barlyq óńiri qatysyp jatyr» deı kele, Túrkistan qalasynyń qurylysy men jandanýyna kómek kórsetip, atsalysqandardyń bárine rızashylyǵyn bildirdi.

– Barlyq josparlanǵan nysandardyń qurylysy aıaqtalǵannan keıin týrısterdiń kóbeıýin kútemiz. Sonymen qatar qosymsha jumys oryndary ashylady. Munyń bári bizdiń halqymyzdyń ómir súrý deńgeıine oń áser etedi, – dedi elimizdiń Tuńǵysh Prezıdenti.

Keleshekte Túrkistan týrıstik ortalyqqa aınalyp, munda 5 mln adam saıahattap keledi degen jospar bar. Elimizdiń astanasyn tańdaý kezinde de Túrkistan oıynda bolǵanyn aıtqan Elbasy bul shahardy oblys ortalyǵyna aınaldyrýdy áýelden oıǵa alǵanyn jetkizdi. –Táýel­sizdik alǵannan keıin árıne, men tipti Astanany tańdaǵan kezde de biraz oılandym, biraq oǵan jaǵdaı bolmady, ózderińiz bilesizder. Mine, endi ýaqyty keldi, Túrkistan qalasyn oblystyń ortalyǵy jasap, qaıtadan jandandyryp, elimizge osy kıeli ordany qaıtarý múmkindigi qolymyzǵa tıdi. Endigi jyly kóp ǵımarat iske qosylyp, jyldyń ortasynda, jarlyqqa qol qoıǵanymyzǵa eki jyl tolǵanda, bárimiz osy jerde kezdesetin bolamyz. Talaı ret keldim, keseneni jóndeýden ótkizdik, ýnıversıtet iske qosyldy. Osynyń barlyǵynyń aıaǵyndaǵy mindet – oblys ortalyǵyn salý edi, soǵan da qol jetkizdik, – dep atap ótti Nursultan Nazarbaev.

Sonymen qatar Elbasy oblys ortalyǵynyń áleýmettik-ekonomıkalyq jaǵdaıy da jaqsaryp, jumys oryndary kóptep ashylatynyn sóz etti.

–Túrkistannyń ornalasqan jeri – toǵyz joldyń toraby. Qytaıdan biz arqyly Eýropaǵa ótetin dáliz bar. Temirjol bar. Sondyqtan táýelsiz Qazaqstanymyzda taǵy bir keremet ortalyq, tarıhı qala boı kóterip otyr. Bul – bárimizdiń qýanyshymyz, – dedi Elbasy.

Nursultan Nazarbaev ekinshi kúni jumys saparyn qorytyndylap, brıfıng ótkizdi. Brıfıng barysynda Elbasy Túrkistan shaharynyń búgingi kelbetine kóńili tolatynyn, degenmen mańyzdy jumystardyń áli de jalǵasatynyn tilge tıek etti. «Kóptegen jańa nysan boı kóterip, jastar úshin jumys oryndary ashylyp jatyr. Aýrýhanalar, mektepter, qonaqúıler, halyqaralyq áýejaı salynady. Sý resýrstarymen qamtý salasyndaǵy máselelerdi sheshý josparlanǵan» dedi Nursultan Nazarbaev. Sonymen qatar Qazaqstannyń Tuńǵysh Prezıdenti ákim­diktiń ınfraqurylymdyq jobalardy júzege asyrý josparlary týraly aıtty.

– Kelesi jyly Ózbekstan, Qyrǵyzstan, Túrkimenstan, Tájikstan basshylaryn sammıtke shaqyrýdy josparlap otyrmyz. Eger olar qatysýdy rastasa, biz ony Túrkistanda ótkizýimiz múmkin. Búkil Qazaqstan jurtshylyǵy Túrkistannyń damýyn qoldap otyr. Árbir úı, árbir qala – bul Qazaqstannyń baılyǵy, – dedi Elbasy.

Áleýmettik jeliniń «áýeni» áli de taýsylar emes. Sońǵy ýaqytta jelidegilerdiń «jeligi» utys oıyndaryna aýdy. Barlyǵy birdeı jarysyp lotereıa oınatyp, bılet satýǵa kóshti. Al az aqshaǵa qomaqty júlde alýdan úmitti qarapaıym halyq utys uıymdastyrýshylarynyń bar talabyn oryndaýǵa ázir. Alaıda áleýmettik jeli arqyly utys oıynyn uıymdastyrý, lotereıa oınatý qanshalyqty zańdy? Bul saýal búgingi kúni búkil qoǵamdy alańdatyp otyrǵany haq.

Sońǵy jańalyqtar