7 Qarasha, 11:56 188 0 Rýhanııat Túrkistan Gazeti

TÚRKISTAN – ER TÚRIKTIŃ BESIGI!

QR Tuńǵysh Prezıdenti – Elbasy Keńsesiniń basshysy Mahmut Qasymbekovtiń «Elbasy jáne túlegen Túrkistan» atty maqalasyn oqyp, tereń oıǵa qaldym. Shynynda da túrki jurtynyń injý-marjanyna aınalǵan Túrkistan tarıhy kimdi tebirentpegen! Maǵjan aqynnyń «Túrkistan – eki dúnıe esigi ǵoı, Túrkistan Er Túriktiń besigi ǵoı...» degen óleń joldarynyń árbir qatarynda qanshama tarıh buǵyp jatyr deseńshi. Túrkistan bir ǵana Alashtyń emes, jalpy túrki halyqtarynyń, tipti Shyǵys halyqtarynyń aq ordasy, astanasy bolǵan desek, qatelespeımiz. Iá, kıeli shahar myńjyldyq órkenıetter toǵysqan, tarıhı kezeńderdiń shejiresin boıyna jınaqtaǵan, júzdegen ulttar men ulystardyń bas toǵystyratyn qasterli mekeni.

Maqalada Qazaqstannyń Tuńǵysh Prezıdenti Nursultan Ábishuly Nazarbaevtyń tarıhı shahardyń jahandyq aýqymdaǵy bedeli men mańyzyn arttyratyn sheshimder men sharalarǵa turaqty qoldaý jasaǵany tereń baıandalypty.

Áıgili memleket jáne qoǵam qaıratkeri Ózbekáli Jánibekov kezinde «Túrkistan úsh júz jylǵa jýyq qazaq handarynyń astanasy bolǵan. Onda halqymyzdyń asyl azamattary, eń qalaýly uldarynyń súıegi jatyr. Ony qasterlemesek bolmaıdy. Túrkistanda oblys ortalyǵy qurylsa jaqsy bolar edi» – dep jazdy. Mine, Óz-aǵa armany júzege asyp, Elbasy N.Nazarbaevtyń kóne shahardy oblys ortalyǵy etip jarııalaǵan tarıhı sheshiminiń arqasynda búgingi tańda kıeli meken túrlenip, qaıta jańǵyryp, órkenıetke bet burdy. Qazaqtyń tarıhyn jınaqtap, qasterlegen kóne shahardyń osynaý gúldengen, túrlengen ǵajap dáýiri bastalǵanyna kýá bolǵan biz de baqytty urpaqpyz.

Hanbıbi ESENQARAQYZY,

aqyn, halyqaralyq «Alash» ádebı syılyǵynyń, «Qurmet» ordeniniń ıegeri

Sońǵy jańalyqtar