6 Qarasha, 15:11 299 0 Zań Anar LEPESOVA

Júrgizýshi kýáliginsiz rólge otyrǵandarǵa salynatyn aıyppul 5 ese artady

Májilis jańa Ákimshilik quqyq buzýshylyqtar kodeksin talqyǵa saldy.  Depýtattar júrgizýshi kýáligi joq tulǵanyń kólik quralyn basqarǵany úshin aıyppuldy 5 esege arttyrýdy kózdep otyr. Bul týraly búgin Májilistiń otyrysynda zańnama jáne sot-quqyqtyq reforma komıtetiniń múshesi, depýtat Qanat Mýsın málimdedi, dep habarlaıdy Zakon.kz.

Qazirgi ýaqytta mundaı quqyq buzýshylyq úshin jaza 10 AEK (25 250 teńge) kóleminde aıyppul tóleýdi qarastyrady. Endi Ákimshilik quqyq buzýshylyq týraly kodekske ózgertýler engizý bastamasyn kótergender bul somany 50 AEK-ke (126 250 teńge) deıin kóbeıtýdi usynýda.

Mýsınniń pikirinshe, Ákimshilik quqyq buzýshylyq týraly kodekske engizilgen túzetýler ákimshilik zańnamany jetildirýge, ákimshilik jaýapkershilikti izgilendirýge, memlekettik organdar men sot bıligi arasyndaǵy ókilettikterdiń arajigin ajyratýǵa baǵyttalǵan. Atap aıtqanda, depýtattar jekelegen quqyq buzýshylyqtardy joıyp, kodeksten alyp tastady. Bul azamattardy jaýapkershilikke tartpaı-aq, sotta azamattyq is boıynsha sheshýge bolatyn daýlarǵa qatysty jasalady. Birqatar quqyq buzýshylyq úshin aıyppuldar mólsheri azaıtyldy. Sondaı-aq qoldanystaǵy ákimshilik jazalar jeńildetildi.

– Sonymen birge depýtattardyń usynysy boıynsha jol qozǵalysy salasyndaǵy belgili bir buzýshylyqtar úshin aıyppuldar kóbeıtildi. Máselen, kólik quralyn júrgizý quqyǵynan aıyrylǵan adam rólge otyrsa, 50 AEK aıyppul salynady. Qazir bul aıyppul mólsheri – 10 AEK. Mundaı buzýshylyqty qaıtalaǵany úshin aıyppul mólsheri 20-dan 70 AEK-ke deıin ulǵaıtyldy. Bul túzetý qazaqstandyqtardyń joldaǵy qaýipsizdigin qamtamasyz etý úshin qabyldandy, – dedi Mýsın.

Sońǵy jańalyqtar