4 Qarasha, 21:11 370 0 Aımaq Anar LEPESOVA

Elbasy Túrkistan turǵyndarymen kezdesti

Túrkistan qalasyna jumys saparymen kelgen Elbasy Nursultan Nazarbaev qala jurtshylyǵymen kezdesti, dep habarlaıdy Elbasynyń resmı saıty

«Túrkistanǵa oblys ortalyǵy mártebesin berý táýelsizdik alǵan birinshi kúnnen bastap este bolǵan. Muny menen burynǵy ómirden ótip ketken el aǵalary da esinde ustaǵan. Ótken ǵasyrdyń ózinde Túrkistan Respýblıkasyn quramyz, Túrkistan bıýrosy dep osy jerde kóp sharýa atqaryldy. Al, endi tarıhqa úńiletin bolsaq, bul - qasıetti óńir. Jıyrma bir hanymyz jerlengen, sultandarymyz ben áýlıeler máńgilik tynyshtyq tapqan óte kıeli oryn. Mine, búgin Túrkistan qalasyn oblys ortalyǵy etip, qaıtadan jandandyryp, elimizge osy kıeli ordany qaıtarý múmkinshiligi qolymyzǵa tıdi. Bul qalanyń búkil Túrki dúnıesiniń ortalyǵy ekeni bárimizge belgili. Ońtústiktegi aǵaıyndar men Ózbekstan, Qyrǵyzstan, Túrikmenstan qýanyp jatyr. Olar da atsalysyp, bizge kómektesedi dep senemin», - dedi Nursultan Nazarbaev.

Elbasy sondaı-aq, Túrkistan shaharynyń aldaǵy ýaqytta iri megapolıske aınalatynyna senim bildirdi.

«Osydan birneshe jyl buryn Túrkistannyń 1500 jyldyǵyn atap ótemiz dep biraz sharýany atqarǵan edik. Sonda osy alańda kezdesip, sóıleskenbiz. Sol kezde Túrkistan ortalyq bolady dep aıtqanmyn. Minekeı, byltyr Túrkistan oblys ortalyǵy bolady degen jarlyqqa qol qoıdym. Elimizde Almaty, Nur-Sultan jáne Shymkent - bir mıllıon turǵyny bar qalalar qatarynda. Bolashaqta osyndaı úlken qalalarda ekonomıka, mádenıet - barlyǵy ósip-órkendeı beredi. Aldaǵy ýaqytta mıllıon turǵyny bar qalalar sany taǵy artady», - dedi Nursultan Nazarbaev.

 

Sońǵy jańalyqtar