2 Qarasha, 11:29 421 0 Óner Anar LEPESOVA

"Farıza" máskeýlik kórermen nazaryna usynyldy

Máskeýdegi «Sovremennık» teatrynyń sahnasynda «Farıza» spektakli qoıyldy. Belgili dramatýrg Roza Muqanovanyń pesasy boıynsha qazaqstandyq jas rejısser Farhat Moldaǵalı qoıǵan bul spektakldiń tusaýkeseri  Almatydaǵy Muhtar Áýezov atyndaǵy teatrdyń sahnasynda ótken bolatyn. 

Reseıdegi qoıylym búkilreseılik teatr marafonynyń baǵdarlamasyna kirip, Qazaqstannyń Reseıdegi kúnderi aıasynda kórsetildi.  Avtorlary «Farıza» qoıylymyn mıstıkalyq drama janryna jatqyzyp otyr. Aqynnyń óleńderi senarııge sheber órilgen. Alaıda bul ádebı kesh te, ómirbaıan da emes. Bul – bas keıipkerdiń ishki dúnıesi men jan sezimin sahnada beıneleý.

"Farıza Ońǵarsynova aqyn bolýymen qatar, Qazaqstannyń mádenı astanasy – Almatyǵa oqýǵa kelgen kóptegen qazaq qyzdarynyń qamqorshysy bolǵan. Olardy ilgeri jeteleıtin. Farıza Ońǵarsynovany óz shabyty sanaıtyn izbasarlary kóp", - deıdi ıdeıa avtory Aınur Kópbasarova.

Zamandastary tarapynan marapatqa bólený men qyzǵanysh. Dostyq pen baqtalastyq. Úlken tabys pen jalǵyzdyq. Aqynnyń osynyń arasynda tańdaý jasaýǵa múmkindigi joq. Shyǵarmashylyq jolynda shabytpen qatar aýyr júkti da arqalaýǵa májbúr. Bul taǵdyrdyń jazǵany. Ejelgi grek tragedııalaryndaǵydaı, aqynnyń paryzy ózgergen joq: jan qınalysyn joǵary ónerge aınaldyrý.

"Álem ádebıetinde Ahmatovanyń, vetaevanyń, Mandelshtam, Blok qandaı álemdik deńgeıde bolsa, Farıza shyǵarmashylyǵy, Farıza taǵdyry, Farızadaǵy jumbaq – biz osyny izdedik. Bul –Farızanyń arpalysy. Barlyq adamǵa tán ǵoı arpalysyp ótý. Qoǵam birde túsinedi, birde túsinbeıdi. Ataq, dańq bola tura adam ózin jalǵyz sezinetin kezder bolady", - deıdi pesa avtory Roza Muqanova.

 

Sońǵy jańalyqtar