29 Qazan, 12:09 452 0 Rýhanııat Anar LEPESOVA

El damýyna úles qosqan qazaqstandyq etnos ókilderi jaıly elektrondy derekqor jasalmaq

Qazaqstanda eldiń tuǵyryn bıiktetip, abyroıyn asqaqtatyp júrgen ózge ult ókilderi kóp. Olardyń qyzmeti men eńbegine tıisti baǵa berý, jalpyhalyqtyq nazarda ustaý áreketin qolǵa alǵan «Rýhanı jańǵyrý» qazaqstandyq qoǵamdyq damý ınstıtýty» KEAQ-sy búginde elimizdiń tórt buryshyn aralap, úlken is tyndyrý ústinde. Instıtýt ókilderi elimizdiń batysy men shyǵysynda bolyp, jaqynda teriskeıdegi óńirge at basyn tiredi. Ótken juma kúni ınstıtýt tóraǵasynyń orynbasary Roza Káribjanova bastaǵan top M.Qozybaev atyndaǵy Soltústik Qazaqstan memlekettik ýnıversıtetinde «Qazaqstan etnostary: elimizdiń tarıhı-mádenı damýyna qosqan úlesteri» taqyrybynda suhbat alańyn uıymdastyrdy. Sharaǵa Nur-Sultan qalasy men Qaraǵandy, Aqmola, Qostanaı óńirlerinen arnaıy ókilder shaqyryldy.

Qolǵa alynyp otyrylǵan sharanyń toqeteri – XIX-XXI ǵasyrlarda elimizdiń damýyna úles qosqan qazaqstandyq etnostardyń eń kórnekti ókilderiniń ómiri men qyzmeti týraly aqparatty elektrondyq derekqor qurý. Bul jobanyń qıyndyǵy júzdegen adamdardyń ishinen eń tulǵalysyn tańdap alýda bolyp otyr. Sondyqtan elektrondyq derekqorǵa engiziletin azamattardyń qyzmeti men eńbegin tereń zerttep, belgili bir talaptarǵa saı kelýin qadaǵalap, úlken jumys júrgizý mindetteledi. 

«Rýhanı jańǵyrý» qazaqstandyq qoǵamdyq damý ınstıtýty» KEAQ bas saraptamashy-menedjeri Rýzııa Kamarova ınstıtýt ár óńirmen habarlasyp, laıyqty tulǵalardyń tizimin jınastyryp jatqandyǵyn jetkizdi. Búginde tizimge 213 azamattyń esimi usynylǵan. Bul sannyń áli de eselene túsetinine kúmán joq. Zertteýshilerdiń aıtýynsha, elektrondyq derekqorǵa eń kórnekti ókilder engizilýi tıis. Ol úshin tańdalatyn tulǵalardyń sińirgen eńbegine qoıylatyn krıterııler naqtylana túsýi kerek. Petropavl qalasynda ótken suhbat alańyna jınalǵandar Qazaqstannyń soltústik jáne ortalyq aımaqtaryndaǵy tanymal otandastardyń ómiri men qyzmetin zertteý boıynsha pikir bildirip, tájirıbe almasty. Sondaı-aq, zertteý jumystaryn ońtaıly júrgizý úshin praktıkalyq usynystar jasaldy.

«Qazaqstan etnostary: elimizdiń tarıhı-mádenı damýyna qosqan úlesteri» atty suhbat alańy qazaqstandyq zııalylar tiziminde oıyp alar orny bar iri tulǵa G.Belgerdiń 85 jyldyǵyna arnalǵan respýblıkalyq ǵylymı-praktıkalyq konferenııamen jalǵasty.

Sońǵy jańalyqtar