15 Qazan, 15:07 311 0 Syrtqy saıasat Anar LEPESOVA

Elbasy Bakýde Ilham Álıevpen kezdesti

Qazaqstannyń Tuńǵysh prezıdenti Nursultan Nazarbaev Bakýde Ázerbaıjan prezıdenti Ilham Álıevpen kezdesti, dep habarlady Elbasynyń resmı saıty. 

Kezdesý barysynda Elbasy eki el qatynastarynyń damýyndaǵy oń dınamıkany atap ótti.

"Bul meniń Qazaqstannyń Tuńǵysh prezıdenti mártebesinde sizderge alǵash kelýim. Elimizde ekonomıkalyq damý baǵdarlamalaryn júzege asyrý jáne táýelsizdikti nyǵaıtý jumystary jalǵasýda. Bizdiń qarym-qatynasymyz qarqyndy damyp jatyr, – dedi Nursultan Nazarbaev.

Elbasy qazir eki eldiń yntymaqtastyqty keńeıtý úshin biraz múmkindigi bar ekenin atap ótti. Saýda kólemin arttyrý mańyzdy.

"Biz tıisti logıstıkany qurdyq. Erteń Túrki keńesiniń otyrysy ótedi. Men qurmetti tóraǵa mártebesin qýana qabyldadym, óıtkeni memleketterimizdiń arasyndaǵy yntymaqtastyqty nyǵaıtýǵa úles qosýdy jalǵastyrǵym keledi", – dep tolyqtyrdy Nazarbaev.

Al Ilham Álıev Elbasyǵa Túrki keńesiniń otyrysyna kelgeni úshin alǵys bildirdi jáne onyń ekijaqty qatynastardy nyǵaıtýǵa qosqan úlesin atap ótti.

"Qazaqstannyń Tuńǵysh prezıdentin Ázerbaıjan jerinde qarsy alý biz úshin zor mártebe. Siz Ázerbaıjannyń úlken dosysyz. Kóptegen halyqaralyq másele boıynsha árqashan bizdiń elimizdi qoldadyńyz. Sizdiń túrki tildes elder arasyndaǵy yntymaqtastyqty nyǵaıtýdaǵy úlesińiz orasan. Mereıtoılyq sammıttiń Bakýde ótip jatqanyna biz óte qýanyshtymyz", – dedi Ázerbaıjan Respýblıkasynyń prezıdenti.

Sonymen qatar, Ilham Álıev Qazaqstan astanasynyń salynýy Baký qalasynyń damýyna úlgi bolǵanyn aıtty.

"Men Qazaqstan astanasynyń tez ózgergenin baıqadym. EKSPO kórmesin tamashalaǵan kezde qurylystyń aýqymy men sáýlettik sheberligine rıza boldym. Qazaqstannyń barlyq jetistigi Sizdiń atyńyzben baılanysty", – dedi Ázerbaıjan Respýblıkasynyń prezıdenti.

 

Sońǵy jańalyqtar