10 Qazan, 13:36 315 0 Memlekettik baǵdarlamalar Ahmet ÓMIRZAQ

QYZMPÝ. «QAZAQ TILINDEGI 100 JAŃA OQÝLYQTY» TALQYLAÝ ESTAFETASY

Qazaq ulttyq qyzdar pedagogıkalyq ýnıversıtetiniń bastamasymen qurylǵan Qazaqstannyń jas pedagog-ǵalymdary Qaýymdastyǵy «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda jaryq kórgen kitaptardy keńinen nasıhattaý maqsatyndaǵy bastamany qolǵa aldy.

Atalǵan oqý ornynyń jas ǵalymdary búginge deıin aýdarylǵan 30-ǵa jýyq eńbekti oqyp, talqylaý úshin joǵary oqý ornynyń 1 kýrs stýdentterine estafeta joldamaq.

QyzMPÝ-dyń resmı ókili Jandar Asannyń aıtýynsha, estafetaǵa qatysý úshin stýdentter qazaq tiline aýdarylǵan kitaptardyń birin oqyp, mazmunyna oraı beınebaıan túsirýi kerek. Sondaı-aq beıne materıaldy Facebook áleýmettik jelisine Qyzdar ýnıversıtetiniń Qyzdar Ýnıversıteti resmı paraqshasyn belgileı otyryp júkteý qajet.

– Qazaq ulttyq qyzdar pedagogıkalyq ýnıversıtetiniń tabaldyryǵyn bıyl attaǵan stýdentter «Kópke umtylǵan jalǵyz» atty kitapty oqyp, atalǵan eńbektiń mazmunymen tolyq tanysyp shyqty. Ony talqylaý maqsatynda jıyndar men pikir almasýlar da ótkizildi. Sonymen qatar «Qyzdar Ýnıversıteti» gazetine maqalalar jazyp, adamzat damýynyń kókjıegine jol ashatyn oqýlyqtardyń ereksheligine sholý jasady. Bizdiń kózdegenimiz – bul ıgilikti iske ózge de joǵary oqý oryndaryn tartý. Osy arqyly jastarǵa dúnıejúzindegi tańdaýly úlgilerdiń negizinde bilim alýyna múmkindik jasaý, – deıdi Jandar Asan.

Estafeta sońynda barlyq beıne materıal jınaqtalyp, sonyń negizinde shaǵyn fılm jaryq kórmek. Ol Qazaqstannyń jas pedagog-ǵalymdarynyń úshinshi sleti qarsańynda kópshilik nazaryna usynylmaqshy.

Qazirgi tańda qazaq tiline aýdarylǵan kitaptar men joǵary oqý oryndarynyń tizimi túzilip, beınebaıandy túsiretin naqty merzimi bekitilgen.

Byltyr Qazaqstan jas pedagog-ǵalymdardyń birinshi respýblıkalyq Sleti qarsańynda otandyq jas pedagog-ǵalymdardyń Qaýymdastyǵy quryldy. Qazaq ulttyq qyzdar pedagogıkalyq ýnıversıtetiniń rektory Gaýhar Aldambergenovanyń ıdeıasymen qurylǵan uıym memleket pen qoǵam damýyna belsendi qyzmet etetin, jańasha turǵyda oılaı alatyn jańashyl jastardy biriktirip, olardyń dıalog alańyn qurýdy maqsat tutady. Búginde deıin atalǵan Qaýymdastyqtyń uıytqy bolýymen birneshe jobalar sátti júzege asyryldy.

Sońǵy jańalyqtar