10 Qazan, 10:51 88 0 Rýhanııat Dınara MYŃJASARQYZY

Qos alyptyń mereıtoıy

Túrkistan oblysynda memleket jáne qoǵam qaıratkeri Sultanbek Qojanovtyń 125 jyldyǵyna arnalǵan «Ultyn ulyqtaǵan qaıratker» atty saltanatty is-shara bastaldy. Sozaq aýdanynan bastaý alǵan merekege aýdan ákimi Salyhan Polatov, jazýshy, halyqaralyq Alash syılyǵynyń ıegeri Marhabat Baıǵut, «Nur Otan» partııasy oblystyq fılıaly Tóraǵasynyń birinshi orynbasary Beısen Tájibaev pen ózge de zııaly qaýym ókilderi, aýdan turǵyndary qatysty.

Sharanyń maqsaty – memleket jáne qoǵam qaıratkeri, ustaz, ǵalym, pýblııst S.Qojanovtyń ónegeli ómirin nasıhattaý. Tarıhymyzda kúni búginge deıin laıyqty baǵasyn ala almaı kele jatqan tulǵalar az emes. Solardyń biri – Sultanbek Qojanov. Onyń tulǵasyn taný men tanytýǵa qatysty birqatar arnaýly zertteý eńbekter jaryqqa shyqty. Degenmen, óskeleń urpaqqa Alash qozǵalysy qaıratkeriniń eren eńbegin keńinen tanytý qajet.

Is-shara aıasynda Sozaq aýdanynda S.Qojanov atyndaǵy 100 oryndyq mekteptiń alǵashqy kirpishi qalanyp, eskertkishine gúl shoqtary qoıyldy.

«Nur Otan» partııasy oblystyq fılıaly tóraǵasynyń birinshi oryn­­basary B.Tájibaev: «Rýhanı jań­­ǵyrý» baǵdarlamasy aıasynda «Nur Otan» partııasy Túrkistan oblystyq fılıalynyń Sozaq, Túlkibas aýdany ákimdikterimen birlese uıymdastyrǵan bul sharasy Memleket jáne qoǵam qaıratkerleri Turar Rysqulov pen Sultanbek Qojanovtyń týǵanyna 125 jyl tolýyna oraı ótkizilýde. Bul avtosapardyń basty maqsaty – qos tulǵanyń eńbekterin el arasynda nasıhattap, urpaq sanasyna sińirý, alys aýyldardaǵy aǵaıynnyń rýhanı áleýe­­tin kóterýge jaǵdaı jasaý», – dedi.

Sultanbek Qojanovtyń qoǵamdyq-saıası qyzmeti ultqa qyzmet etýdiń jarqyn úlgisi boldy. Ol ultjandylyǵy memleketshilikpen ulasqan, memleketshiligi ultynyń rýhyna qyzmet etýge jumyldyrylǵan qaıratker halyqtyń jadynan da, ǵylymı tanymnan da mártebeli oryn alýǵa ábden laıyq. Qoǵam qaıratkerleri men aqyn-jazýshylar, belgili ǵalymdardan quralǵan «Aqsúmbe men Aqsý-Jabaǵyly arasy» avtosaparyn qos alyptyń týǵan jerlerinde rýhanı kezdesýler ótkizip, Qojanov pen Rysqulov eńbekterin keńinen nasıhattaý jónindegi keńesterimen bólispek.

Mereıtoı ary qaraı aýdan ortalyǵy Sholaqqorǵanda jalǵasyn tabady.

Al qoǵam jáne memleket qaıratkeri Turar Rysqulovtyń týǵanyna 125 jyl tolýyna oraı, Túlkibas aýdanynda «Nur Otan» partııasy Túrkistan oblystyq fılıaly, oblystyq mádenıet jáne tilderdi damytý basqarmasy men Túlkibas aýdany ákim­digi uıymdastyrǵan «Ult tarıhyndaǵy jarqyn tulǵa» sharasy da óz deńgeıinde ótti. Delegaııa ókilderi 1915 jyly «Alash» qaıratkeri, tuńǵysh qazaq ınjeneri Muhametjan Tynyshpaevtyń basshylyǵymen soǵylǵan Jaskeshý aýyldyq okrýgi Rysqul aýylynyń mańynda ornalasqan týnnelmen tanysyp, T.Rysqulovtyń ata qonysy Rysqul aýylyndaǵy kúrdeli jóndeýden ótken aýyldyq klýbtyń ashylý saltanatyna qatysty. Sonymen qatar, Túlkibas kentindegi toǵyz joldyń toraby – Túrkisib temir­jolynyń boıynda ornalasqan qos qaıratker – M.Tynyshpaev pen T.Rysqulovtyń eskertkishine arnaıy baryp, gúl shoqtaryn qoıdy.

Aıtýly shara «Ult tarıhyndaǵy jarqyn tulǵa» atty taqyryptaǵy sal­tanatty jıynmen qorytyndylandy. Túrkistan oblysy ákiminiń oryn­basary S.Qalqamanov Turar ómi­ri jaıly qysqasha baıandama jasasa, «Nur Otan» partııasy oblystyq fılıa­ly Tóraǵasynyń birinshi oryn­ba­sary B.Tájibaev qazaq halqynyń bola­shaǵy úshin kúresken tulǵalardy keńi­nen nasıhattaý qajettigine toqtaldy.

Sońǵy jańalyqtar