8 Qazan, 12:00 171 0 Saıasat Anar LEPESOVA

Darıǵa Nazarbaeva: Áıelderdiń memlekettik basqarýǵa qatysýyn keńeıtý kerek

Senat tóraǵasy Darıǵa Nazarbaeva jumys saparymen Aqtóbe oblysynda boldy. Ol «Nur Otan» partııasynyń oblystyq bólimshesinde azamattardy qabyldady. Sondaı-aq birqatar kezdesýler ótkizdi.

Palata tóraǵasy oblystaǵy kásipker áıelderimen kezdesýde memlekettik basqarýǵa, respýblıkalyq jáne aımaqtyq deńgeıdegi ókildi organdar jumysyna áıelderdiń qatysýyn keńeıtý máselesin kóterdi. D.Nazarbaeva kezdesýge qatysýshylarǵa otbasylyq jáne genderlik saıasat tujyrymdamasynyń jańa jobasyn talqylaý týraly áńgimeledi. Genderlik teńdik qaǵıdalary – qujattyń negizine aınalyp otyr.

«Bizdiń mindetimiz – áıelderdiń memlekettik basqarýǵa, saıasat pen ekonomıkaǵa qatysýyn keńeıtý. Másele keńinen talqylanyp jatyr. Arab elderindegi ahýalmen birge álemdik tájirıbede áıelderdiń úkimetke, aımaqtarǵa basshylyq etýge jáne depýtattyq korpýsqa qatysýyn kvotalaýǵa deıin árkelki sheshimder aýqymyn kórsetip otyr», - dep atap ótti D.Nazarbaeva.

Senat basshysy jastar jáne eriktiler uıymdarymen kezdesýde Jastar jyly aıasynda óńirde ótken sharalardyń nátıjelerimen, sondaı-aq jastardy qoldaý jónindegi oblystyq baǵdarlamalar men jobalardyń júzege asý barysymen tanysty. Jastardyń eriktiler qyzmetine qatysýyn yntalandyrýǵa erekshe nazar aýdaryldy. Onyń aıtýynsha, eldegi eriktilikti yntalandyrý men kótermeleýdiń naqty tetikterin zańnamalyq turǵyda bekitý qajet bolyp otyr.

Budan bólek, Darıǵa Nazarbaeva senatorlarmen birge Áýe qorǵanysy kúshteriniń T.Bıgeldınov atyndaǵy áskerı ınstıtýtynda boldy. Senat Tóraǵasy ınstıtýttyń materıaldyq-tehnıkalyq jabdyqtalýymen tanysyp, oqytýshylar quramymen kezdesti jáne kýrsanttarmen áńgimelesti. Oqý úderisteriniń materıaldyq-tehnıkalyq jabdyqtalýy máseleleri jáne bolashaq ushqyshtar men áýe ınjenerlerin daıarlaý sapasy kezdesýdiń negizgi taqyryby boldy.

Al óńirdegi buqaralyq aqparat quraldarynyń basshylarymen kezdesýde elimizdiń aqparat naryǵynyń mańyzdy máselelerin talqylady. D.Nazarbaeva aımaqtaǵy dástúrli BAQ pen ǵalamtor jelisinde jumys isteıtin jańa medıa salasynyń ekonomıkalyq jaǵdaıyna erekshe nazar aýdardy. Sondaı-aq elimizdegi buqaralyq aqparat quraldaryn damytýǵa arnalǵan salalyq baǵdarlamany ázirleýge belsendi qatysýǵa shaqyrdy.

 

Sońǵy jańalyqtar