19 Qyrkúıek, 12:16 425 0 Nur Otan Anar LEPESOVA

Ardagerler dán rıza

«Batamen el kógerer» degen halyq danalyǵyn basshylyqqa alatyn «Nur Otan» partııasy «Ardagerlerdi ardaqtaıyq!» jobasy aıasynda qarttarǵa jyl boıy qamqorlyq kórsetedi. Qarııalardy týǵan kúnderimen, aıtýly merekelermen quttyqtap, syı-syıapat jasaý, úı sharýasyna kómektesý sekildi ıgi sharalardy qolǵa alǵan partııalyqtardyń qamqorlyǵyna ardagerler dán rıza.

17 jasynda qan maıdanǵa attanǵan Ivan Hıenko qurlyqtyq ásker sapynda bolyp, Odessa, Qyrym, Stalıngrad qalalaryn qorǵady. Polsha, Varshavadan Poznanı qalalaryn jaıaý júrip ótken. Jeńisti Kalınıngrad oblysynyń Pıllaý qalasynda qarsy alǵan. Aldyńǵy shepte erlik kórsetken maıdanger soǵystan keıingi jyldary uzaq ýaqyt boıy kólik júrgizýshisi bolyp qyzmet etken. Toqsannyń úsheýine kelgen qarııany partııalyqtar arnaıy quttyqtady.

– Eki jyl boıy maıdan shebinde boldym. Kópti kórdim. Otanymyzǵa bostandyq syılaýda ózimizdi aıamadyq. Keıingi býyn ókilderinde tap sondaı eljandylyq, patrıottyq qasıetteri bolsa eken deımin, – deıdi maıdanger Ivan Hıenko.

Al 94 jastaǵy Qasymhan aqsaqal soǵys bastalǵanda nebári 17-de bolǵan. Ýchılıeden keıin tankke qarsy qarý alyp, maıdan shebine attandy. Ardager soǵystan keıin qarýdy qalamǵa aıyrbastap, «Qostanaı tańy» gazetinde menshikti tilshi bolyp jemisti eńbek etken. Búkil sanaly ǵumyrynda urpaq tárbıesine aralasqan ulaǵatty ustaz-tálimger, halqymyzdyń ǵajaıyp óneri – aıtysty, jyraý-termeshilikti nasıhattaýǵa arnady. Týǵan kún ıesin partııalyqtar arnaıy quttyqtaı kelipti.

– Ár ataýly kúnderi ardagerlerimizdi quttyqtap, qolymyzdan kelgenshe kómek berip, jaǵdaılary qıyndarǵa qol ushyn sozýǵa tyrysamyz. Ardagerlerimizdi qamqorlyqqa alyp, qart maıdangerlermen qatar, jalǵyzbasty tyl eńbekkerlerine de kómek kórsetýge atsalysyp kelemiz, – deıdi «Nur Otan» partııasy Qostanaı oblystyq fılıaly tóraǵasynyń orynbasary Almat Dosmuhamedov.

Partııalyqtar ardagerlerdi týǵan kúnimen quttyqtap, kómek kórsetýdi dástúrge aınaldyrǵan. «Munyń bári jeńisti jaqyndatqan jaýyngerlerge kórsetilgen qurmet, erlikke taǵzym» deıdi partııa belsendileri.

Sońǵy jańalyqtar