19 Qyrkúıek, 12:14 400 0 Nur Otan Anar LEPESOVA

Kósh qaıta jandanady

El turǵyndaryn halqy tyǵyz qonystanǵan aımaqtardan soltústik óńirlerge kóshirý úrdisi jalǵasýda. Sońǵy 4 jylda Túrkistan oblysynan 4 myńǵa jýyq otbasy soltústikke qonys aýdaryp, memlekettik qoldaýdyń arqasynda turmystaryn túzep úlgerdi. Búginde bul jobany jandandyrýǵa «Nur Otan» partııasy Túrkistan oblystyq fılıalynyń mamandary jumyla kirisken. Osy oraıda,  partııa fılıaly Saıram aýdanyn aralaý barysynda ózbek dıasporasyn da  «Eńbek» baǵdarlamasyn júzege asyrýda belsendi bolýǵa shaqyrdy. Nátıjesinde, 52 otbasy soltústikke kóshýge nıet bildirdi. Ózbek etnos ókilderiniń arasynda mundaı strategııalyq mańyzdy kezdesý buryn-sońdy bolmaǵan. 

«Nur Otan» partııasy Túrkistan oblystyq fılıaly «Eńbek» baǵdarlamasyn nasıhattaý maqsatynda óńirimizdegi halqy tyǵyz aýdan turǵyndarymen kezdesýler uıymdastyrýda.

Elbasynyń bastamasymen 2015 jyldan beri júzege asyp kele jatqan «Eńbek nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda Túrkistan oblysynda sońǵy 4 jylda 881 otbasy nemese 3377 adam qonys aýdaryp, memleket tarapynan áleýmettik kómekpen qamtamasyz etilgen.

Túrkistan oblystyq partııa fılıaly tóraǵasynyń birinshi orynbasary Beısen Tájibaev bastaǵan aqparattyq-nasıhattyq top halyq sany joǵary, tyǵyz ornalasqan Saıram aýdany, Qarabulaq eldimekeni turǵyndarymen kezdesti.

Kezdesýge Túrkistan oblystyq Qazaqstan halqy assambleıasy hatshylyǵynyń meńgerýshisi Ǵ.Rysbekov, Saıram aýdany ákiminiń orynbasary M.Orazalıev, aýdandyq fılıaly tóraǵasynyń birinshi orynbasary A.Ábdiqadyrov jáne oblystyq máslıhat depýtattary J.Aǵabekov, B.Nyshanqulov qatysty. Sondaı-aq Bilim salasynyń qurmetti qyzmetkeri, qoǵam belsendisi Ó.Shynybekuly, Pavlodar oblysy Ertis aýdany ákiminiń orynbasary J.Saǵynaev, Soltústik Qazaqstan oblysy M.Jumabaev aýdanynyń jumyspen qamtý bóliminiń bas mamany N.Tanbetova jáne oblystyq jumyspen qamtýdy úılestirý jáne áleýmettik baǵdarlamalar basqarmasynyń ókilderi de is-sharaǵa arnaıy keldi.

«Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Dáýlet­uly kezdesý barysynda Prezıdent Qasym-Jomart Toqaevtyń Qazaqstan halqyna arnaǵan Joldaýyna toqtalyp, ózbek dıasporasyn «Eńbek» baǵdarlamasyn júzege asyrýda belsendi bolýǵa shaqyrdy.

– Qarabulaq – elimizdegi eń turǵyny kóp aýyl. Bul aýylda 60 myńnan astam xalyq bar. Alaıda bıyl aýdannan soltústikke bir otbasy ǵana shyqqan. Jobada soltústikke barýshylar úshin arnaıy mal baǵý men egin salýǵa jer beriledi. Óńirde 400 myńnan astam sharýaqor ózbek aǵaıyndar turady. Olar osy baǵdarlamany oryndaýǵa belsene qatyssa, halyq jumyspen qamtylyp, baspanaly bolyp, soltústik jaınap, elimizdegi kóptegen máseleler sheshimin tabatyn edi, – dep jurtshylyqty múmkindikti barynsha paıdalanýǵa shaqyrdy.

Jıynda sondaı-aq Túrkistan oblystyq Qazaqstan halqy assambleıasy hatshylyǵynyń meńgerýshisi Ǵ.Rysbekov «Ońtústikten Soltústikke kóshirý» baǵdarlamasynyń mańyzy týraly baıandama jasady. Soltústikke qonys aýdarǵan jerlesterimizdiń tynys-tirshiligimen jaqynda ǵana tanysyp qaıtqan nasıhattyq top músheleri aýyl turǵyndaryna memleket tarapynan berilip jatqan qoldaýlar men múmkindikter týraly keńinen túsindirip, olardyń suraqtaryna jaýap berdi.

Sońǵy jańalyqtar