17 Qyrkúıek, 10:48 472 0 Ádebıet Anar LEPESOVA

Abaıdyń jıenshary uly aqyn urpaqtarynyń búgingi ómiri jaıly aıtty

Uly Abaıdyń jıenshary Láılá Baımaǵambetova 10 jyldan beri Nur-Sultan qalasynda turady. Sputnik Qazaqstan portalyna bergen suhbatynda Láılá Muhlesqyzy hákim Abaıdyń urpaqtary týraly aıtyp berdi.

Láılá Baımaǵambetova Abaıdyń báıbishesi Dildáden súıgen tuńǵysh balasy Aqylbaıdan taraıdy. Aqynǵa jıenshar bolyp keledi. Sondaı-aq ol Abaı Qunanbaıulynyń ǵana emes, ertekshi Baımaǵambettiń de urpaǵy. Arǵy atasy Baımaǵambet – Abaıdyń senimdi serigi, arqa súıer dosy bolǵan.

"Aqylbaıdan Álimqul, Álimquldan – meniń anam Qaýash. Sheshem 1910 jyly ómirge kelip, 1988 jyly dúnıeden ótti. Endi urpaq jalǵaıtyn ul balasy ǵoı. Anamnyń Baǵfýr degen baýyry bolǵan. Sol Baǵfýrdan Aıdar, Aıdardyń uly Danııar. Ol qazir otbasymen Almatyda turady. Úsh qyzy bar, áıeli orys. Sondyqtan Abaıdyń urpaǵy ázirge Danııarmen toqtap tur", - dedi Láılá Muhlesqyzy.

Láılá Baımaǵambetova ózi – orys tili pániniń muǵalimi. Uzaq jyldar oqý-aǵartý salasynda eńbek etken. Keıin Semeıdegi Abaı mýzeıine aýysqan. Astanaǵa qonys aýdarǵanyna on jyldyń júzi bolypty. Jary Óskenbaımen birge bir ul, eki qyz tárbıelep ósirgen. Qazir zeınette.

Aqynnyń urpaqtary taǵdyrdyń talaı taýqymetin tartqan. "Baıdyń balasy" degen jeleýmen qýǵyn-súrginge ushyraǵan. Aqynnyń shóbereleriniń deni soǵysqa attanyp qaza tapsa, endi biri asharshylyq jyldarynda kóz jumypty.

"Qolymyzda Abaı atamyzdyń kózi tirisinde ustaǵan birde bir dúnıesi qalǵan joq. Bári de tárkilendi. Abaı urpaqtarynyń taǵdyry óte aýyr boldy. Onyń urpaqtary nege neken-saıaq? Sebebi sol zamanda Qunanbaıdyń urpaqtarynyń izine tústi. Abaıdyń Turaǵul degen uly eki ret abaqtyǵa jabyldy. Aqyry Almatyny panalaýǵa májbúr boldy. Ol jerde Muhtar Áýezovpen jolyǵyp, jazýshynyń túrtki bolýymen ákesi jaıly estelik kitap jazdy", - dep eske aldy Baımaǵambetova.

Sońǵy ret aqynnyń urpaqtary Abaıdyń 160 jyldyq mereıtoıynda bas qosqan.

"Basqa qalada turatyndyqtan, kóp aralaspaımyz. Tek Maǵaýııanyń urpaqtary Iaǵy jáne Ǵazel tátelermen únemi baılanysta boldym", - deıdi Láılá Baımaǵambetova.

Sońǵy jańalyqtar