10 Qyrkúıek, 18:01 244 0 Jańalyqtar Túrkistan Gazeti

«Nur Otan» partııasy Saıası menedjment mektebiniń dırektory bolyp Shyńǵys Nurlanov taǵaıyndaldy

«Nur Otan» partııasynyń Lıderi Nursultan Nazarbaevtyń partııanyń jumysyn jandandyrý jáne kadrlardy jańartý jónindegi tapsyrmasyna sáıkes, partııanyń Saıası menedjment akademııasy Saıası menedjment mektebi bolyp ózgertildi. Al mekteptiń dırektory bolyp «Bolashaq» baǵdarlamasynyń túlegi Shyńǵys Nurlanov taǵaıyndaldy.

«Nur Otan» partııasynyń Saıası keńesiniń keńeıtilgen otyrysynda partııa Tóraǵasy álemniń jetekshi oqý oryndarynda memleket esebinen bilim alǵan qazaqstandyq jas mamandardy jumysqa kóbirek tartýdy tapsyrǵan bolatyn.

Shyńǵys Nurlanov Vashıngton ýnıversıtetin «saıasattaný» mamandyǵy boıynsha támamdaǵan. Nazarbaev Ýnıversıtetiniń «bilim berý salasyndaǵy kóshbasshylyq» mamandyǵy boıynsha magıstri. Qazaq, orys, aǵylshyn jáne túrik tilderin meńgergen.

Ol ár jyldar Respýblıkalyq fızıka-matematıka mektebiniń astanalyq fılıalynyń meńgerýshisi, Nazarbaev Ýnıversıtetiniń Joǵary bıznes mektebiniń konsýltanty, QR Bilim jáne ǵylym mınıstrliginiń Aqparattyq-saraptamalalyq ortalyǵynda bilim berý menedjmentin zertteý boıynsha jetekshi taldaýshysy, «Nur Otan» partııasy Qoǵamdyq saıasat ınstıtýtynyń sarapshysy, Halyqaralyq yntymaqtastyq boıynsha nemis qoǵamdastyǵynyń (GIZ) kásiptik bilim boıynsha ulttyq úılestirýshisi, «Bolashaq» halyqaralyq baǵdarlamasy ortalyǵynda menedjer, oqytýshy t.b. qyzmetter atqardy.

Saıası menedjment mektebiniń jańa basshysyna birqatar naqty mindetter júkteldi. Atap aıtqanda, partııa mamandaryn qoǵammmen baılanystyń praktıkalyq daǵdylaryna, janjaldardy sheshý, medıaııa jáne t.b. oqytý arqyly daıyndaýdy jetildirý tapsyryldy.

Aıta keteıik, buǵan deıin «Aiqyn» gazetiniń bas redaktory bolyp, «Bolashaq» baǵdarlamasynyń taǵy bir túlegi Nurmuhamed Baıǵara taǵaıyndaldy. Ol bul taǵaıyndaýǵa deıin «Egemen Qazaqstan» gazeti AQ basqarma tóraǵasynyń keńesshisi, bas redaktorynyń orynbasary qyzmetin atqardy.

Sońǵy jańalyqtar