9 Qyrkúıek, 16:54 298 0 Áleýmet Anar LEPESOVA

Boryshy keshirilmegender qosymsha tizimge qalaı enedi?

Prezıdent Qasym-Jomart Toqaevtyń qıyn jaǵdaıǵa tap bolǵan azamattardyń nesıesin keshirý týraly Jarlyǵynan keıin alty sanat boıynsha 507 myńǵa jýyq boryshkerdiń qaryzy keshirildi. Alaıda kómekke shyn muqtaj keıbir azamattar óz esimderin bul tizimnen tappaı dal. Oqyrmandar saýalynyń kóbeıýi áli de aqparattandyrý sharalaryn arttyra túsý qajettigin kórsetip otyr.

Birinshiden, Jarlyqta aıqyndalǵan alty toptyń birine kiresiz be, kirmeısiz be – sony anyqtap alý kerek.  Olar – kóp balaly otbasylar; asyraýshysynan aıyrylý jaǵdaıyna baılanysty tólem alatyn otbasylar; múgedek balalary bar, 18 jastan asqan bala jasynan múgedekter bar otbasylar; ataýly memlekettik əleýmettik kómek alatyndar; jetim balalar; ata-anasynan kámelettik jasqa deıin aıyrylǵan, 29 jasqa tolmaǵan, ata-ananyń qamqorlyǵynsyz qalǵan balalar.

Ekinshiden, nesıeńiz kepilsiz bolýy shart.

Úshinshiden, bıyl 1 maýsymǵa deıingi qaıtarylmaǵan bereshegińiz 3 mln teńgeden aspaýy tıis.

Tórtinshiden, negizgi borysh pen oǵan eseptelgen syıaqysy 300 myń teńgeden aspaýy qajet.

Eger osy tórt talaptyń barlyǵyna saı kelip, biraq memleket boryshyńyzdy keshirmese, sizdiń mártebeńiz týraly aqparat ortalyq memlekettik organdardyń aqparattyq júıelerinde joq degen sóz.

Eńbek jáne áleýmettik qorǵaý mınıstrligi baspasóz qyzmetiniń habarlaýynsha, joǵaryda kórsetilgen sanattaǵy azamattardyń tizimi ortalyq memlekettik organdardyń aqparattyq júıeleriniń derekteri negizinde júzege asyrylǵan. Atap aıtqanda, Bilim jáne ǵylym mınıstrligi jetim balalardyń, ata-anasynyń qamqorlyǵynsyz qalǵan, kámeletke tolǵanǵa deıin ata-analarynan aıyrylǵan 29 jasqa tolmaǵan balalardyń, 23 jasqa deıingi stýdentterdiń tizimin usynǵan. Ádilet mınıstrligi «Azamattyq hal aktileriniń jazbalary» aqparattyq júıesinde erli-zaıyptylar nemese ata-analar boıynsha ózekti azamattyq hal aktileri (neke jáne týý týraly) boıynsha málimetterdi tekserýdi júzege asyrǵan. Osylaısha mınıstrlik 2 mıllıonnan asa adamnyń tizimin Ulttyq bank pen Memlekettik kredıttik bıýroǵa bergen. Ulttyq bank kredıti joq, jalpy qaryzy 3 mln teńgeden asatyn, bereshekteri kollektorlyq uıymdarǵa berilgenderdi tizimnen alyp tastady. Sóıtip 630 633 qaryzdar men mıkrokredıtter boıynsha bereshekti óteıtin 506 941 boryshkerdiń tizimi jasalǵan.

Eger siz joǵaryda atalǵan barlyq sharttarǵa saı keletinińizge senimdi bolsańyz, alaıda qaryzy keshirilgen boryshkerler tiziminen esimińizdi tappasańyz, bank bólimshelerine nemese Halyqqa qyzmet kórsetý ortalyqtaryna sabylýdyń qajeti joq. 111 call-ortalyǵyna habarlasyp ózińizben qosa otbasy músheleri týraly aqparatty beresiz. Budan keıin memlekettik organdar siz týraly aqparatty tekserip, atalǵan alty sanattyń birine kiretinińiz anyqtalsa tizimge qosady. Tizimge engennen keıin Ulttyq bank sharttaryna sáıkestigińiz tekserilip, tıisti sheshim shyǵarylady.

 

 

Sońǵy jańalyqtar