9 Qyrkúıek, 16:27 177 0 Jańalyqtar Túrkistan Gazeti

Frıstaıldan Olımpıada chempıony Qazaqstan akrobattarynyń keńesshisi bolyp taǵaıyndaldy

Búgin Qazaqstan UOK-tyń shtab-páterinde frıstaıl-akrobatıkadan ulttyq quramanyń jańa keńesshi-jattyqtyrýshysy Anton Kýshnır resmı túrde tanystyryldy. 35 jastaǵy belarýs mamany, 2014 jylǵy Sochı Olımpıadasynyń chempıony qazaqstandyq akrobattardy jattyqtyrýǵa kómektesedi dep habarlaıdy Olympic.kz. 

Qazaqstan UOK Bas hatshysy Sáken Musaıbekov jańa keńesshi-jattyqtyrýshyny tanystyra otyryp, onyń tájirıbesi men sportshy retindegi tabysty mansaby tek otandyq sportshylarǵa ǵana emes, sonymen birge, qazaqstandyq jas bapkerlerge da paıdasyn tıgizedi dep atap ótti.

Anton Kýshnırdiń sporttyq mansabynda Olımpıada altynynan basqa álem kýbogy da (2009/2010) bar. Sondaı-aq, ol álem kýboginiń (2007/2008) jáne álem chempıonatynyń (2011) qola júldegeri atanǵan. Aıta keterligi, ol Olımpıada oıyndarynda shańǵy akrobatıkasyndaǵy eń qıyn jattyǵýdy oryndaǵan. Qıyndyǵy 5,0 koefıentti bes pırýetpen úsh ese sekirip, 134,5 upaıyn enshilegen. Bul nátıje Olımpıadada bir sekirýde jınalǵan eń joǵary upaı boldy.

«Shilde aıynda ózimniń sporttyq mansabymdy aıaqtaý týraly sheshim qabyldadym. Sportshy retinde men sportqa 27 jylymdy arnadym. Óz tájirıbemdi sportshylarmen bólisip, bapkerler quramyna, jattyqtyrýshylarǵa  sportshyny daıyndaýǵa kómektesýge daıyn ekenimdi  baıqadym. Sondyqtan men Qazaqstan quramasynyń usynysyn qabyldap, birge jumys isteýge qýana kelistim. Meniń mundaǵy basty mindetim, árıne, sportshylardyń nátıjesin jaqsartý, sonymen qatar, jattyqtyrýshylarǵa keńesshi retinde kómektesý. Jumys barysynda Gennadıı Nıkolaevıch syndy bilikti bapkerden meniń de alarym kóp dep oılaımyn. Qazaqstan UOK-ne senim artqany úshin úlken alǵys bildiremin. Endi senimdi aqtaý úshin barymdy salatyn bolamyn»,-deıdi Anton Kýshnır.

Anton Kýshnır Ýkraınada dúnıege kelgen, alaıda sportta Belarýs eliniń namysyn qorǵap, týyn jelbiretken. Tórt Olımpıadaǵa qatysqan ol búginde sportshy retinde mansabyn aıaqtap otyr. Jattyqtyrýshy retinde qyzmetin Qazaqstan ulttyq quramasynan bastaıdy.

Akrobattardyń maýsymy 21 jeltoqsanda Qytaıda ótetin álem kýbogynyń birinshi kezeńinen bastalady. Jańa maýsymda Qazaqstan quramasynda komanda kóshbasshysy Janbota Aldabergenovamen birge 6 sportshy bar. Ótken maýsymda Janbota Ýnıversıadada úshinshi oryn alyp, 2019 jylǵy álem birinshiliginde toǵyzynshy orynnan kóringen bolatyn.

Frıstaıl-akrobatıkadan Qazaqstan quramasynyń tizimi: Aqmarjan Qalmurzaeva, Ińkárbek Baǵlan, Eldar Badrýtdınov, Roman Ivanov, Aıana Joldas, Marjan Aqjigit.

Sondaı-aq, qazaqstandyq akrobat Jibek Arapbaeva jańa maýsymnan bastap frıstaıl-akrobatıkadan quramanyń aǵa jattyqtyrýshysy qyzmetin atqarady.

Sońǵy jańalyqtar