9 Qyrkúıek, 11:21 363 0 Bilim Anar LEPESOVA

Dene shynyqtyrý sabaǵynda kóz jumǵan oqýshynyń ustazdary jazalandy

Ústine fýtbol qaqpasy qulap, mert bolǵan qazyǵurttyq oqýshynyń óliminen keıin jergilikti sheneýnikter, mektep basshylyǵy jáne dene shynyqtyrý páni muǵalimi jazalandy.

8-synyp oqýshynyń dene shynyqtyrý sabaǵy kezindegi oqys ólimi túzdegi balasy úshin onsyz da alańdap otyratyn ata-analardyń úreıin kúsheıtti. Oqıǵadan keıin Túrkistan oblysynyń Qazyǵurt aýdanynda kámelet jasqa tolmaǵandardyń isteri jónindegi komıssııanyń shuǵyl otyrysy ótken. Bilim jáne ǵylym mınıstriniń buıryǵy boıynsha, algorıtm negizinde bolǵan jaıt týraly 3 saǵat kóleminde habarlanýy tıis.Aqparatty bilim salasyndaǵy tıisti organdarǵa jetkizý kerek bolǵan. Alaıda atalǵan buıryq oryndalmaǵan.

Komıssııa jumysy men tergeý amaldarynyń nátıjesinde kináli tulǵalardyń, sonyń ishinde Áýezov atyndaǵy mekteptiń dene shynyqtyrý pániniń muǵalimi Ábdiǵappar Esenbekovtiń  jaýapkershiligi qaraldy. Muǵalim jumysynan ýaqytsha shettetilgen. Oblystyq polıııa departamentiniń tergeý bóliminiń basshysy Qaıbar Máliktiń málimdeýinshe, sotqa deıingi tergeý júrgizilýde.

Budan bólek, mektep dırektory Eskendir Musaqulov pen oqý isi jónindegi meńgerýshisi Qanat Isabaevqa «atqaryp otyrǵan qyzmetine laıyq emes» dep jarııalandy. Al bilim bólimi basshysynyń orynbasary Álııa Egizek qatań sógis, aýdan ákiminiń orynbasary Serik Tursynqulov sógis aldy.

Brıfıngte sport zaldarynda sporttyq zattardy paıdalaný qaýipsizdigin qamtamasyz etýge baǵyttalǵan shara júrgiziletini málimdendi. Bul rette mını-fýtbol nemese gandbol oınaǵan kezde qaqpany bekitý máselelesi qaraldy.

 

Sońǵy jańalyqtar