9 Qyrkúıek, 09:00 170 0 Jańalyqtar Túrkistan Gazeti

Qazaqstannyń Tuńǵysh Prezıdenti Reseı Federaııasynyń Prezıdenti Vladımır Pýtınmen kelissózder ótkizdi

Kremlde kezdesý barysynda Nursultan Nazarbaev pen Vladımır Pýtın eki eldiń ózara is-qımylynyń negizgi aspektilerin talqylady. Bul týraly Elbasy.kz habarlady.

- Qazaqstan-Reseı qarym-qatynasy úlgi etýge turarlyq. Mundaı baılanys kóptegen elderge ónege. Men ózara is-qımyldyń osyndaı deńgeıge jetýi úshin bar kúshimdi saldym. Biz sonymen birge, sátti damyp kele jatqan jáne barlyq múshe elderge paıdasyn tıgizetin Eýrazııalyq ekonomıkalyq odaq qurdyq, - dedi Qazaqstannyń Tuńǵysh Prezıdenti.

Elbasy Reseı Prezıdentin Máskeý qalasynyń kúnimen quttyqtap, sáttilik jáne Reseı astanasynyń gúldene berýin tiledi.

Máskeý qalasynyń kúni merekesine shaqyrǵanyńyz úshin rahmet. Máskeý barshamyzǵa óte jaqyn. Erte jastan bastap biz osynda keldik, oqydyq jáne jumys istedik. Halyq sharýashylyǵy jetistikteriniń kórmesi qyzmet etken jyldardyń bárinde halyqtarymyzdyń dostyǵyn nyǵaıtýǵa óz úlesin qosqanyn atap ótken jón. Jeńistiń 75 jyldyǵyn merekeleý qarsańynda osy surapyl soǵystaǵy jeńiske adamdardyń birliginiń arqasynda qol jetkenin atap ótkim keledi, - dedi Qazaqstannyń Tuńǵysh Prezıdenti.

Óz kezeginde Reseı kóshbasshysy Qazaqstannyń Tuńǵysh Prezıdentiniń ekijaqty qatynastardy qalyptastyrý jáne damytýdaǵy erekshe rólin atap ótti.

- Qurmetti Nursultan Ábishuly, bizge mereke kúni kelgenińiz úshin rahmet. Siz Reseı-Qazaqstan qatynastaryn ornatýshysyz. Bul baılanystar gýmanıtarlyq, áskerı salalarda, áskerı tehnıkalyq yntymaqtastyqta odaqtastyqtyń buryn-sońdy bolmaǵan eń joǵary deńgeıine jetti, biz tolaǵaı tabysqa qol jetkize almaıtyn qyzmet salasy joq. Biz Sizdi kórýge árqashan qýanyshtymyz jáne bizdiń jeke baılanystarymyzdyń jalǵasyp jatqanyna qýanyshtymyn, - dedi Vladımır Pýtın.

Sońǵy jańalyqtar