6 Qyrkúıek, 18:57 244 0 Jańalyqtar Túrkistan Gazeti

B.Baıbek: Jyl boıy jer-jerde alaman aıtystar uıymdastyrýdy qolǵa aldyq

«Nur Otan» partııasy tóraǵasynyń orynbasary Baýyrjan Baıbek Instagram jelisindegi paraqshasynda aıtyssúıer qaýyǵa súıinshi jańalyǵymen bólisti.

«Aıtyssúıer qaýymǵa jarııalar súıinshi habarymyz bar. Taıaý kúnderde «Nur Otan» partııasynyń qoldaýymen Altaı men Atyraý, Alataý men Arqa arasyn dúbirli dýmanǵa bóleıtin Aıtys alamany bastalady. Bul - aıtys dese arqasy qozyp, rýhy asqaqtaıtyn qazaq úshin orny bólek mereke. Sondyqtan, Táýelsizdiktiń alǵashqy sátinen-aq Elbasy ultymyzdyń uly murasyn, ozyq dástúrleri men mádenı qazynasyn túgendeýge, olardy zamanǵa saı túletip, jańǵyrtýǵa erekshe den qoıdy. Halyq óneriniń órkendeýine jaǵdaı jasap, daryndy jandarǵa jol ashty. Elbasynyń tikeleı bastamasymen iske asyrylǵan «Mádenı mura» jobasynda, «Bolashaqqa baǵdar: Rýhanı jańǵyrý», «Uly Dalanyń jeti qyry» baǵdarlamalyq maqalalarynda da ulttyq rýhanı muramyzdy, qundy jádigerlerimizdi, sporttyq oıyndarymyz ben óner saıystaryn túgendep, damytýǵa erekshe mán berilgen. Elbasy negizin qalap, kóshbasshylyq jasap kele jatqan «Nur Otan» partııasynyń doktrınasynda da qamtylǵan basty qundylyqtarymyzdyń biri – otbasy men dástúr. Onda «qazaq tilin, mádenıet pen dástúrdi damytý - bizdiń strategııalyq basymdyǵymyz» ekeni naqty kórsetilgen», - dep jazdy Baýyrjan Baıbek.

Habarlanyp otyrǵandaı, «Nur Otan» partııasy jyrshy-termeshilerge, aıtys óneri men ulttyq sport túrlerine udaıy qamqorlyq jasap keledi.

«Ejelden «Bas kespek bolsa da, til kespek joq» dep, han aldynda dat aıtyp, erkin oıǵa erik bergen, barshaǵa birdeı teńdik bergen elmiz. Sondyqtan ultymyzdyń osyndaı ozyq ónerin, izgi dástúrlerin jalǵastyrý bizdi kemeldendire túsedi. Osyǵan oraı partııa Tóraǵasynyń bastamasymen qaıta jańǵyrýǵa kirisip, ekinshi tynysy ashylyp otyrǵan saıası uıymymyz aıtysqa aıryqsha nazar aýdaryp otyr. Osy maqsatta biz partııa qoldaýymen jyl boıy jer-jerde alaman aıtystar uıymdastyrýdy qolǵa aldyq. Bıyldyń ózinde jyl sońyna deıin bes aıtys ótkizemiz. Barshańyzdy alda ótetin osynaý arqaly aqyndardyń sóz saıysyna kelip, óreli ónerimizdi tamashalaýǵa shaqyramyn», - dep jazdy Baýyrjan Baıbek.

Tegter Aıtys

Sońǵy jańalyqtar