4 Qyrkúıek, 10:49 440 0 Jańalyqtar Túrkistan Gazeti

Darıǵa Nazarbaeva BUU Bas hatshysynyń arnaýly ókilimen kezdesti

Parlament Senatynyń Tóraǵasy Darıǵa Nazarbaeva BUU Bas hatshysynyń arnaýly ókili, BUU-nyń Ortalyq Azııadaǵy preventıvti dıplomatııa jónindegi óńirlik ortalyǵynyń jetekshisi Natalıa Germanmen kezdesti. Bul týraly Parlament Senatynyń baspasóz qyzmeti habarlady.

Kezdesý barysynda óńirlik yntymaqtastyq, preventıvti dıplomatııany nyǵaıtý, áıelder men jastar bastamalaryna qoldaý kórsetý máseleleri talqylandy.

Senat Tóraǵasy Qazaqstannyń BUU bastamalaryn qoldaıtynyn, elimiz úshin Uıym men onyń qurylymdyq mekemelerimen qarym-qatynas ornatý syrtqy saıasattyń basym baǵyttary ekenin atap ótti.

«Biz BUU basshylyǵyna Qazaqstannyń halyqaralyq bastamalaryna turaqty qoldaý bildirip otyrǵany úshin rızashylyǵymyzdy bildiremiz. Oǵan Bas hatshy A.Gýterrıshtiń  2016 jylǵy Qazaqstanǵa sapary aıqyn kórsetkish», dedi D.Nazarbaeva.

Óz kezeginde Natalıa German Qazaqstan álemde ekonomıkalyq jáne áleýmettik damýdyń tańǵajaıyp modeli retinde qabyldanatynyn aıryqsha atap ótti.

«Qazaqstan beıbitshilik, turaqtylyq jáne qaýipsizdik isine zor úles qosyp keledi. Biz muny óte joǵary baǵalaımyz. Sizdiń elińizdiń mańyzdy strategııalyq jobalarǵa belsendi qatysyp kele jatqanyn kórip otyrmyz. Sondyqtan qazir Qazaqstannyń Ortalyq Azııa elderiniń áıelder uıymy jelisin qurýǵa qatysqanyńyzdy qalaımyz. Meni osy osy ıdeıaǵa Sizdiń Aýǵanstandaǵy áıelderdiń quqyǵy men múmkindigin keńeıtý boıynsha ótkizgen óńirlik konferenııasy shabyttandyrdy», dep atap ótti N.German.

Darıǵa Nazarbaeva bul bastamaǵa qoldaý bildiretinin jetkizdi: «Áıelder qaýymyn memlekettik basqarýǵa qatystyrý, ekonomıkalyq jáne áleýmettik ómirge aralastyrý múmkindigin keńeıtýdi qoldaý qajettigi sózsiz. Osy jyly bizdiń palatamyzǵa senator áıelder qosyldy. Bul óte jaqsy. Biraq onymen toqtap qalmaımyz. Elimizde názik jandylardy nátıjeli jumyspen áleýmettik kótermeleý basym baǵyt bolyp otyr».

Sondaı-aq kezdesý barysynda jastar máselesi sóz boldy. N.Germannyń aıtýynsha, búgingi kúni Ortalyq Azııa óńirinde 29 jasqa deıingi 50 paıyzdan astam jastar ómir súrip jatyr. Sondyqtan bıylǵy jyly onyń basshylyǵymen jastar arasyndaǵy preventıvti dıplomatııany damytýǵa qoldaý kórsetý jónindegi ortalyq qurylatyn bolady.

Darıǵa Nazarbaeva Óńirlik ortalyqtyń osy saladaǵy atqaryp otyrǵan jumystaryn joǵary baǵalady. «Siz óńir jastary úshin Preventıvti akademııany iske qosýdy josparlap otyrǵanyńyzdy bilemiz. Bul bastama bizdiń elimizdiń jastar saıasatyna saı keledi, sonyqtan biz úshin óte qyzyqty. Ózińizge bilgili, osy jyly Elbasy N.Nazarbaevtyń bastamasymen Jastar jyly bolyp jarııalandy. Jastar jylynda eldi, memleketti damytýda jas býynǵa aıryqsha, sheshýshi ról júktelip otyr dep senemiz. Olardy jumysqa ornalastyrýǵa, bıznes-startaptardy qoldaýǵa, volenterlik qyzmetti yntalandyrýǵa baǵyttalǵan baǵdarlamalar bar», dep atap ótti Darıǵa Nazarbaeva.

Sonymen qatar taraptar BUU-nyń Óńirlik ortalyǵymen transshekaralyq sý resýrstaryn birlesip paıdalaný men qoldaný salasyndaǵy jumysyn talqylady.

«Qazaqstanda Ekologııa, geologııa jáne tabıǵı resýrstar mınıstrligi quryldy. Jańa Ekologııalyq kodeks te ázirlenip jatyr. Munyń barlyǵy da Ortalyq jumysymen úndesedi. Ortalyq Azııa elderimen birlesip, sý-ekologııa problemalaryn sheshýge septigin tıgizetin kóp jyldyq strategııa ázirleý qajet dep sanaımyz», dedi Darıǵa Nazarbaeva.

Sońǵy jańalyqtar