29 Tamyz, 11:25 464 0 Óner "Túrkistan" gazetiniń avtorlary

«Tarıhı mura janashyry» atty kórme ótti

Qazaqstan Respýblıkasy Mádenıet jáne sport mınıstrligine qarasty «Áziret Sultan» memlekettik tarıhı-mádenı qoryq-mýzeıiniń uıymdastyrýymen memleket jáne qoǵam qaıratkeri, ǵalym-etnograf Ózbekáli Jánibekovtiń 88 jyldyǵyna oraı ómiri men shyǵarmashylyǵyna arnalǵan  «Tarıhı mura janashyry» atty kórme ótti.

Qazaq mádenıetiniń qara naryna balanǵan, «Áziret Sultan» memlekettik tarıhı-mádenı qoryq-mýzeıiniń negizin qalaýshy, qasıetti taıqazannyń tarıhı ornyna oralýyna úles qosqan ǵalym-etnograf Ózbekáli Jánibekovtiń týǵan kúninde onynshy ret ótken kórmege «Áziret Sultan» memlekettik tarıhı-mádenı qoryq-mýzeıi dırektorynyń orynbasary M.Tastanbekov, Ó.Jánibekovtiń shákirti, ári qyzmettesi Qanat Tuıaqbaev, Túrkistan qalalyq Ardagerler keńesiniń tóraǵa orynbasary Pernetaı Dosybekov, Ó.Jánibekov­tiń qaryndasy Aıǵanym Serim jáne Torǵaıdaǵy qyzmettesi  Ydy­rys Jumabekov, mýzeı qyzmetkerleri men BAQ ókilderi qatysty.

Akademık Manash Qozybaev: «Ózekeń ózindik izi bar, ózindik jigeri bar, quryshtan somdanyp quıylǵan batyr, ǵalym, qaıratker, ónerpaz azamat retinde qazaq tarıhynda esimi qattaldy» dep jazsa, jazýshy Ábish Kekilbaev: «Ulttyq memleketimizdiń qaıtadan qalpyna keltirilip, táýelsiz damý jolyna túsýine de Ózaǵańnyń sińirgen eńbegi erekshe» dep tebirengen.

Otyrardaı qasıetti óńirde dúnıege kelip, ál-Farabıdeı babasyn rýhanı ustaz tutyp, ata-baba murasymen sýsyndaǵan Ózbekáli Jánibekov óse kele qazaqtaný ǵylymynyń qara naryna, ult maqtanyshyna aınaldy. Ol qazaq halqynyń mádenıetiniń, ana tiliniń, dástúri men ádet-ǵurpynyń jańaryp, damýyna orasan zor úles qosty. HH ǵasyrdyń 70 jyldarynyń ózinde-aq, Qoja Ahmet Iasaýı kesenesiniń qalpyna keltirilýine uıytqy boldy.

Kórmege ulttyq óner men mádenıettiń janashyry atanǵan ǵalym-etnograftyń 60-tan asa jádigeri qoıyldy. Olardyń qatarynda Ózbekáli Jánibekovtiń balalyq shaǵy men qyzmettik jyldaryndaǵy fotosýretteri, Qazaqstandaǵy mýzeılerdi uıymdastyrýdaǵy sheberligi, óziniń tutynǵan zattary – fotoaparaty, qol sómkesi, qalamy, shapany, bas kıimi, qalamynan týǵan «Otyrar», «Qazaq kıimi», «Jolaıryqta», «Taǵdyr taǵylymy», «Eho» syndy kitaptary men maqalalary, Torǵaıda qyzmet atqaryp júrgende berilgen estelik zattary, jumys bólmesinde paıdalanǵan mármárdan jasalǵan qalamsaby bar. Sonymen qatar Ózbekáli Jánibekovtiń jeke kitaphanasyndaǵy shetel ádebıetteri men otandyq jazýshylardyń kitaptary da kórmege kelýshilerge tanystyryldy.

 

Jánibek ÁShIM

 «Túrkistan-aqparat»

Sońǵy jańalyqtar